هبوب الشعر

عليك الله هبي ياهبوب الشعر صدري ضاق
عسى تبرد هموم قام جور الوقت يحكمها

ليا هب النسيم من الشمال وحرك الاشواق
يتل من الضلوع العوج امور كنت كاتمها

خياله من مناشيه المشاعر لاح له براق
وسيوله واوديتها في خصاب ارضي ملازمها

اثر كسر المشاعر مايجبر مثل كسر الساق
ولو يدري بها من خاف ربه مايحطمها

بحثت ولا عرفت اسباب نقض العهد والميثاق
ولا ضنيت به من صمم الفكره وسممها

ليا ضلى الزمن قاسي وحبل الارتباط دقاق
يقصه حد سكين الحسد لو كان تثلمها

تجرعت المراره لو طعمها مر ماينذاق
لكن اليوم صار يطيب لي ويلذ علقمها

عسى الجنه جزا الصابر لو ان الصبر ماينطاق
جداد ايام عمري صارت اقسى من قدايمها

هموم القلب والفكر المحيم تسطر الاوراق
وسكون الليل في معزل عن الاصوات موسمها

تجي فيها الحقايق من صميم وتكشف الاعماق
ردود افعال ويترجم لبيب العقل مبهمها

وينسخ من صدور العشق منظر وحشة العشاق
ويعرف ثاقب النضره على امثالي معالمها

صح لسانك شاعرنا القدير
تقبل مروري