اضغط هنا ـــ المشاكل

المشاكل بالعوارف رجال تحلها

اا
الزمن دوار والعمر خاتمته زوال=يانديبي قل للاجواد بالله قلها
يارجال آخر زمن فكروا به يارجال=فيه ناس ٍ ضايعه ماعرفنا دلها
القلوب مكربنه بين جيم وبين دال=والنفوس النايمه كيف تصحي كلها
من يفكربآخرالوقت جا فيه انفعال=ناس دورات الزمن علته ثم علها
ان حكيت يكبرون الحكي كبر الجبال=لو سواليفك حقيقه تغير كلها
وان تفضلت بنصيحه تصير بلا مجال=لو تنادي بالنصيحه ماحد يفطلها
مايحبون الصراحه يحبون الجدال =استبد الظلم بقلوبها واحتلها
والنوايا مع بعضهم صفر على الشمال=ناس ماتامن بها دقها مع جلها
ولو تكلمت يتعرضك خبل ٍ به هبال=يحلم بسيرة هل الطيب بس يزلها
مايعرف الزين والشين وعلومه هزال=وان هرج سل الكبود السليمه سلها
سكبته سكبت ولد شيخ مافيها جدال=بس تغسل يدك كان الصحيفه فلها
بالغرور يعد نفسه من خيار العيال=والعلوم الكايده ماقدر ياصلها
مادرى ان الطيب للي مثل شكله محال=مايجيب الطيبه كود من يدلها
مايحوز الطيبه واحد ٍ حيده هيال=والحمول الها عزوم الرجال تقلها
والمناصي تنعرف والعدود الها حبال =والمشاكل بالعوارف رجال تحلها
وشجرة ٍ ماشيف فيها مقيل ولا ضلال=انصحك ياللي تبي الضل روح وخلها
ومجلس ٍ يجلس به مروجة قيل ٍ وقال=مقعدن به يهفي النفس لين يذلها
ومن رضي بمجالس اهل الردى فيه اختلال=صحبة الرديان سم الكبود وغلها
ومن مشى درب المعزه ورد حوض ٍ زلال=وكل رجال ٍ وله منزله يحتلها
الله الله ياهل الطيب ياعيال الحلال=كل رجال ٍ سيوف الوقار يسلها
وكل فعل بدون خوف ٍ من الله به ميال=ينكره راعيه لو نفعته في حلها
ومن ضعف دينه فانا اباشره بالانحلال=والله ليبطي وهو قربته ما بلها
والرياء راعيه مذموم لو بالفعل طال=ينكشف تال الزمن و الامور يخلها
والكذوب يبين ما يختفي في كل حال=لو يـمـنّ النفس بالستر مايحصلها
ذا كلام اللي يصوغ الجواب من السؤال=والنقاط الغامضه بالرموز يحلها
والسلام ختام وارجو السموحه يارجال=معذره بملاحظات القصيده كلها

عبدالعزيز بن عبد الله بن مجهول المرشدي

" لا فض فوك " بارك الله فيك يا اخي عبدالعزيزالمرشدي

إن من الشعر لحكمة ، وإن من البيان لسحرا

عبد العزيز المرشدي
بارك الله فيك ومشكور على الابيات الجميلة

اخوك
الوجيه

صح لسانك يا عبد العزيز ..

قصيده جميله جدا وجزله ولا هي غريبه عليك ..

الف شكر ,,,