سد الرمق !

السلام عليكم وكل عام وانتم بخير



بويتات متواضعه اتمنى ان تعجبكم





ياسعود ياراع العلوم الجميله=ياصاحبي ماهي بحاجة عزاوي

الهقوة انك ترتكي للثقيله=وانا اعرفك ما انته بدون الهقاوي

خل العذر ياشوق شقرا الجديله=والشك زايل وانت ما انت برداوي

الوقت ما يوحيك لو تشتكي له=ابكم .. عمى ...واصم ماهوب ياوي

والناس ماتسقيك غير الحثيله=ماينفعك غيرك وخلك غناوي

كم عاقل ٍ بالناس ضيّع دليله=حاول يجاريها ولا هو بقاوي

ماعاد هي لحية سلوم القبيله=بعض العرب عن سلم جده نحاوي

ومن دوّر الكذاب يلقى بديله=ومن دوّر الصدقان مامن حراوي

والهامل اللي قام يطرق شليله=غاوي ومن يتبع مباديه غاوي

قله يخيل البرق قله يخليه=ويطرد سراب مرددين الحكاوي

لو يلحق الغايات راع الوسيله=سد الرمق مابل ريق المناوي

تشبه حكاية ألف ليله وليله=والعهده اللي جابها كل راوي

والعمر صبحه راح وانت بمقيله=مير اغتنم باقيه قبل الدعاوي

وان عودت لي من ورا الحيل حيله=وانا على الشدات حبلي رهاوي



وسلامتكم

لاهنت وصح لسانك ونطمع بالمزيد

صح بدنك


القصيد واجد والله اني مدري وش اختار


ماار تباني عاد اعلمك


عسى الله يجملنا


تقبل تحياتي يابو رازن

صح لسانك يا شاعر شعبي

وبيض الله وجهك

من غير مجامله

قصيدك يصحّي من النوم

ويطرب المسامع و يرضي الذائقه

صح لسانك

وبيض الله وجهك يا الغالي

مرورك يالدغيلبي هو اللي ينومس


ويشجع ويفرح



لا خلا ولا عدم يابعد راسي



لاهنت على كلامك الطيب اللي تشرفت به



تقبل تحياتي ومودتي

صح بدنك يابن وايل




والله لايهينك



شرفتني بمرورك



تقبل تحياتي