مساجلة بين الشاعر سعيد بن عياد والشاعر سعيد بن عواد الذيابي

قصيدتان رائعتان للشاعرين الكبيرين سعيد بن عياد الشيخ العتيبي والشاعر سعيد بن عواد الذيابي العتيبي .

قصيدة الشاعر سعيد بن عياد الشيخ العتيبي :

يا راكب اللي ولعوا فيـه دوار
من شركته ورد بلوحات تصدير

توه على التمرين طبلونه اصفار
ما ردده راع الغنم بالمشـاوير

عليه مندوبٍ مضرى بالاســفار
يمشى الصباح وجعلها له مسافير

والعصر عند مكرم الضيف والجار
عند اللوازم ما يحسب المخاسـير

لجيت ابن عواد ودوا له الاخـبار
ومطلوب رد الخط من غير تاخير

ثم انشده عن صحته عقب ماصار
بعد حباله جذبـــوها من البير

يا خال ذا روضك بعيدين الانظار
لحطوك بين المصيده والشناكير

اللي معه سكيـن واللي بمنشار
واللي معه شاكوش دق المسامير

خلوك مثل موالي الغار والنار
مصرمٍ من قلة دموعه شغاتير

اللي رميته عقب سرن الاقدار
واليوم والله ما تفيـد المعاذير

انت اقترفت الذنب والرب غفار
ارجع لربك واطلبه خاتمة خير

وصلاة ربي عدةّ اوراق الاشجار
على نبي ظهر الحــق تظهير


ثم رد عليه الشاعر سعيد بن عواد الذيابي العتيبي بهذه القصيدة :

يا راكب اللي ما ربا يم الاوزار
مرباه من خشم الرحاوي للنير

اول اغــذاه ومركبٍ فوقه اذيار
حتى صنع جسمه حليب المصاغير

وثاني اغذاه العشب في كل مخضار
امصلحٍ في نجد في وسط المخاضير

من ميزته كـوعه بعيدٍ عن الزار
وعينه كما جمرةٍ على حامي الكير

اخذ من الريم اوصوفه ليا انذار
واخذ من الرّبا حـلايا وتصوير

عطية الرحمن مأمـون الاخطار
قسم الحوادث ما كتب عنه تقرير

عليه رجلٍ من بعيديــن الاذكار
معروف في قطع الفرّج والمسابير

يمشي من العارض بعيدٍ عن القار
ما يقبل السكه وصوت المواطير

وليلة ثمان ليال حدن ومعبار
قد وصلنه بالرساله على خير

ملفاك ابن عياد ملفاً للاخيار
عيد الركاب اللي لفنه مناحير

ضارٍ على ذبحة كبيرات الاوقار
شريف ما يشري لحوم الجزازير

قله ترى صاحبك ماهوب محتار
من شان طيرٍ جاه قدمه مداوير

لا تنكرون من النداوي ليا طار
اللوم خله للطيـور المجاحـير

ما دام إلك قيمه وحشمه ومقدار
اعنز على رزاق عكف الدناقير

وليا كلوا عرضك ضعيفين الافكار
بالك تعارض طايـشات المعاصير

ما كل منهو يطرد الصيد صقار
ولا كل رجالٍ يعـرف المعابير

ضاعت خمومي عند عامر وعمار
اللي لهم عندي مـــقامٍ وتقدير

اقفا بهم طير الهوى نسل الاحرار
مايسمعون اصوات عذال ومشير

ناديت فيهم لين عدمن الابصار
وهذي حظوظٍ مقبلات ومدابير

ومن جاب مجهوده له الله عذار
والصيد طرده ولعـةٍ للصقاقير

هذا وصلى الله على خير الابرار
عدّ النبات وعدّ ما رفرف الطير


وشكرا لكم ونرجو ان تحوز على الاعجاب
-----------------------------------------------------------
زماننا غير زمانهم وحتى نتذكر الاولين
اخوكم ابن نجد

اي بالله حازت على الاعجاب اختياراتك طيبه يا ابن نجد الله يعطيك العافيه


اخوك \ ابن فرحان