ماتعمر بيوتن معاصير الزمان تهدها

هذه قصيده جديده لها مناسبتها الخاصه

اتمنى انها تنال عللى رضاكم واستحسانكم






ياالي تفاخر كل يوم بفعل سمحين الجناب=أفخر بمدك لاتفاخر بالرجال ومدها
عطنا فعولك مع هل الوقفه مادام الراس شاب=خل العرب وأفعالها منته بجاين قدها
وعطنا فعول جدودك ألي نصهم تحت التراب=يوم الرجال أهل الفعايل تفتخر في جدها
وأن كان مالك فالمراجل لاظعون ولاركاب=أبعد عن أهل المرجله لاتدرق في سدها
طيب الرجال ألهم ولالك عندهم طاقه وباب=ولأنته خشير أهل الفعول ولأنت واقف ضدها
حنا صبرنا والصبر فالوقت مايملا نصاب=ونص الوجيه الي مثل وجهك تعدت حدها
لاتحسبنا مانفرق فالخطيه والصواب=ولانميز بين مزح أهل الهروج وجدها
لاوالله الا نعرف الطيّب ونحسبله حساب=وألا الهلايم ياعسى الله مايكثر عَدها
سود الليالي علمتنا العلم قدام الكتاب=والخيبه ماهي لنا والطيبه نرتدها
الله كسانا المعرفه قبل العمايم والثياب=والمرجله قسمن لنا وموسمين(ن) خدها
لكن ريح فالبسيطه لاتشره فالسحاب=ودوك العلوم الوافيه للي سواتك ودها
الرجل لن كانه رجل من روس قومن ماتهاب=ماهمه هروج الضعوف الي هزيلن ردها
في ذمتي ماينتعير فالزمان ولايعاب=مادام فعله جزل من بين الفعول وبدها
وألي موردها على الهزله وبيته من خراب=ماهو مضوي منفعه والنفس هذا ودها
والله لتبطي جرته خلف المتاهه والسراب=مادام نفسه للشتيمه والهضيمه حدها
عساه فدوه للرجال وللحرار وللذياب=وفدوه لناقضة الجديل الي ماغير تكدها
أحسن له يصابي مع العربان ويشيل الزهاب =وألا الجزيله مستحيل انه يحصل عِدها
وختامها عندي (مِثَل) قلته بعد طال العتاب=ماتعمر بيوتن معاصير الزمان تهدها

الشاعر ...ابراهيم الزراقي

صح لسانك يالزراقي
على هالأبيات الجميلة ..
لاهنت على الجزالة ولاتحرمنا من جديدك ..

شكراً اخوي بجاد الثبيتي على مرورك العطر

والله لايهينك

صح لسانك يالزراقي
على هالأبيات الجميلة ..
لاهنت على الجزالة ولاتحرمنا من جديدك ..

حاكم الغنامي

صح بدنك والله لايهينك

مرورك يسعدني