البرق يبرق للشاعر/رائد الحزيمي

البرق يبرق على الجمش وضواحيها
وانا بوسط الجبيل وضايق بالي

الله يهون على نفسي بلاويها
وبأذن الله تهون لاجريت موالي

قم يابو راما ويمكنا نسريها
ناخذ لنا ايام في وسط الخلا الخالي

الاجهزه مغلقه لازم نخبيها
من يوم نمشي بوسط الدرج جوالي

نبعد عن الديره وصجه بواريها
ونبدل الحال من حال(ن) ليا حالي

عن المدينه نبعد وش نبي فيها
ونبعد عن اهل الهروج وقيل والقالي

اهل النميمه كثيرات دواديها
اهل الهروج الخفاف الي على الخالي

نخاوي رجال تشرف من يخاويها
من ربعي اهل الكرم ذربين الافعالي

وقدامك دعيج والطليان شاريها
والعزبه مجهزه والجيب شغالي

ويروح قدام وخيامه يبنيها
ومجهزن كل شي ووضعهم عالي

قصائد وقنص والخطر نسليها
وفي كل ليله لنا ياخوك منزالي

نمشي مع البدو ونعاين مراعيها
وننشد عن اخبارهم ونشوف الاحوالي

اتبع هوى النفس دام الموت قافيها
خلك عن الهم دايم داله وسالي

خل الاجازه يابو راما نقضيها
بشبيرمه ديره الحزمان الابطالي

يالله ياللي تسوق المزن تسقيها
نون عليها ثمان ليال همالي

وتربع ديارها والي حواليها
وشعبانها تمشي من الجال للجالي

ذي غايتي يابو راما يوم اغنيها
واخير منهاالصلاه ودعوه الوالي


كلمات ِ/ رائد بن محمد الحزيمي

صح لسااانه...

صح الله بدنكك وشكرا على مرورك