قصيدة إهداء قبيلة القرافين من الشيابين من عتيبه

تغير المفهوم بين الفهيمين
وضاعوا وكلن ماعرف له نحيه

زاد الطفح والهرج من غير تقنين
والتبع صار اليوم مافيه زيه

الناس قامت تخلط الشين بالزين
محد يميز بين هاذي وذيه

وانا وبالتاريخ حسب القوانين
حبيت أعد أفعالنا الأوليه

أفعال مثبوته عليها براهين
ماهيب بالاعلام والعنجهيه

وإن جاء التفاخر بالجدود المسمين
أنا جدودي مقدم بكل هيه

كسابت البل ملحقين المخلين
ونقالت العاني بعزم وحميه

نعزل ولا يعزل علينا الذويين
وقولن بليا ثبت ماهوب ليه

عاداتنا ننزل بدار المعادين
بالغصب ماجتنا المنازل عطيه

أهل شداد وفالملاقا سلاطين
امجادنا ورثه ماجتنا هميه

دخيلنا له عام يامن وشهرين
يامن بوجه أهل العزوم القويه

الروم حنا يوم وقت الاكاوين
أهل الظفر وأهل الكفوف النديه

مركاضنا يشبع جياع السراحين
وخيالنا يكسر لوحده سريه

قبل الحكم تعرف فعول القرافين
كم شيخ قومٍ نخلفه عن نويه

واليوم لاعدوا بدود الشيابين
في مقدم الأسماء لنا الاولويه

والله يديم الامن ويثبت الدين
ويعز حكم العزوة الفيصليه

شعر/ صالح بن مصلح بن عجل