مجموعة قصايد للشاعر/سلطان الجلاوي سهم عتيبة

راكب اللي كل مامنـي عطيتـه
قام يسبح مثل من في البحر عايم
وارد النيسـان لامنـي نويتـه
يسبق اللي في علو الجو حايـم
مجلسن تحت المكيف ما اهتنيته
ضارين راسي على لفح السمايم
كم غبشت وكـم ليلـن سريتـه
عن دورة المرجلة مانـي بنايـم
يوم ولد اللاش دايم حـدر بيتـه
مجلسه معروف مع غبر اللثايـم
مير يا فيحـان علـم ان لقيتـه
والله اني ما ارتجي فزعة هلايـم
والصلاة ختام والمصحف قريتـه
والسعـد قدامنـا والحـظ قايـم



كان يا منصور ابوك الصبح هاوي
للمـراح ولا يـردنـه ظـروفـه
قله اني مع صلاة الصبـح نـاوي
اعطي الفكسار لين اكتـم بلوفـه
وانا غدا للسير والمكـره تعـاوي
ما على المشوار والطرقه حسوفه
ما نقيل غير في بيـت الجـلاوي
بيت عود ما تريح ليـن اشوفـه
شوف ابويه مايجيلـي بالمنـاوي
شوف من يفرح لياكثروا ضيوفـه
ودي اسلم علـى الحـر النـداوي
واتعـذر منـه واقبـل كفـوفـه
لي شهر وانا على شوفه شفـاوي
بس وقتي ويش اسوي في صدوفه
كل ما ينحيبي الوقـت النحـاوي
اتحـرى ساعتـن فيهـا نكوفـه
يم ابوي ويـم مخلفـة الهقـاوي
البكار اللي لهن نفسـي شغوفـه
ما حلى قدامهـن جـر الغنـاوي
لا اتزح برق الحيا والزم قدوفـه
ما قهرناها على الوادي السنـاوي
في اول الوسمي وفي مقدم صيوفه
الربيع ادنى المرابيـع الصـداوي
والعقوم اللي على الحد معروفـه



هيه يا نجل العيون اللي علـى طاريهـا
تستريح هجوس قلبـي ويتريـح بالـي
هيه يا اللي ما اهتني وارتاح لين اطريها
هيه يا الي كثر ما احبه معـذب حالـي
لاتحسبني علـى حبـك مسويـن فيهـا
والله انك عندي اغلةى من جميع آمالي
انتي شمعة حبي اللي مستحيل اطفيهـا
اكيف ابطفيها وانا محتاج لنور اقبالـي
انتي عندي نور هالدنيا وبعد مـا فيهـا
والله لتبطي يا غالي وانت عندي غالـي
صوتك ونظرات صوتك مسمعي يوحيها
ما تقـول الا مكلمنـي علـى جوالـي
وان رقدت الليل جيت وجيتـك نشريهـا
حتى لو هي حلم ابشريها وبرخص مالي
يعني افهم راح سلطان الجـلاوي فيهـا
لكن ألحق قبل ارمي غترتـي وعقالـي
وقبل اقول السبة اللي لا صدف طاريهـا
تستريح هجوس قلبـي ويتريـح بالـي




انا ما شريت الجيب يابو فهد مجـان
انا شريتيله كـان تجهـل سبايبهـا
ابي الصبح لا قالو على الحد يا فيحان
بروق تشادح فـي مقـادم سحايبهـا
نباري الملحا لامشت تعبث الذرعـان
وخطرن من الملـزم تمـزه جنايبهـا
شهاب الخدود اللي تطاولبها اللحيان
قصار الفقار اللي طوالـن غواربهـا
شهاف البكار اللي ليا طوّل الميـدان
ليا طوّل الميـدان والليـل حاظبهـا
علي الحرام اني لطوعبهـا الفدقـان
عشان غالـي ينتبـه مـن عواقبهـا
بعد ثالث الأعياد في راي ابو سلطان
نباهـا تحـدر بعـد كفـت مزاهبهـا
وعقب عاشر الأعياد بسم الله الرحمان
تهارفو للصمـان والصلـب عاقبهـا
وجو ثـلاث ايـام وتعقـل الحيـران
على الحد لابو ديرتن ما تليـق ابهـا
وهذا هو بالي وشفي مـع الجذعـان
ولبو لحيتن ما تحتميهـا شواربهـا




ياجرح كبدي على اللي شافته عيني
في ثالث العيد يوم النـاس ملتمـه
قابلت غـرو ٍ عـذاب ٍ للمحبينـي
يلعب بقلب الهواوي في طرف كمه
قابلتهـا ووقفـت يمـي تنابينـي
لكـنّ موحيتهـا خجلـه ومهتمـه
من خوف لحد ٍ يناظرها تحاكينـي
وانا بعد حرص مبغى هرجة الخمه
وقفـت وقلبـي تتلـه بالشراينـي
تل الرشاش للدلي من منهل الجمه
الخشم منقاد من بين الحجاجينـي
والعين عين الوحش في ذمتي ذمه
وحواجب ٍ كنها هـلال الشيابينـي
والخـد ماكنـه الا بـارق الغمـه
سنه ان بالغت يمكن حول عشريني
اصغير سنه نهيـده بـاول الزمـه
من بعد شوفه منام الليل جافينـي
العين عافت لذيذ النوم مـن همـه
لولا اللحن يوم اغنيبـه يسلينـي
لطش ثوبي ولالحق ثوبـي العمـه
وياليت مجدل بعد غنيت يوحينـي
يوم ارفع الصوت بين الناس وادمه
خابره في نفس مشواري مخاويني
حب الهوى والموده شاربـن دمـه




الموضوع متجدد وسيتم وضع قصائد لشاعرنا لم تنشر من قبل



تقبلو تحياتي/ابو شداد

يعطيك العااااااااااااااافية