لاتعتذر

السلام عليكم ،،


لاتعتذر لي / ما يفيدن الأعذار
مايِرجع الماضي صدوق المعاذير


أسكت / مدام الوقت بالناس دوّار
بكره على رأسك تدور المقادير


وتذوق بعد الحاليه كأس الأمرار
وتنزاح عن وجهك رسوم التباشير


وتصير للوعات والحسره اثار
بعد السعاده جالها فيك تأثير


حتى اتعرف فيني بعد صدّك اش صار
يامعلقٍ حلمي على ريشة الطير


سنّك صغير وحيلتك حيلة كبار
غلطان من قال الصغيره من صغير


اعطاك ربي حسن يسحر له انظار
واحرمك لا صعب الأمر حسن تدبير


تنبش جروح الحب باعناد واصرار
وانته تميل ان مالت الفيّه اعصير


في ذمتي لو هي على كيفي اختار
ما عفت من شانك جميع الغنادير


ولا طاحت الدمعه وحلو الكرى طار
ولاخانني في حزة الضيق تعبير


ياما على عشانك تعرضت الاخطار
وياما شكت رجلي طوال المشاوير


لو كانت الدنيا شذى ورد وازهار
تشوفها جنّه وعندي زمهرير


العام أحبك حب واغليك واغار
ياكثر مالك من معزّه وتقدير


واليوم زاير غيرك اميات زوّار
تصبح على خير وتمسّى على خير !


وسلامتكم ،،

صح لسانك يا ابومنير

ولاهنت.

العام أحبك حب واغليك واغار
ياكثر مالك من معزّه وتقدير


واليوم زاير غيرك اميات زوّار
تصبح على خير وتمسّى على خير !


صح لساأااااانك يا جمال وأبيااات جزلة وفي الصميم مثل طلقة الرامي

وسجل إعجاأبي يا بو منيرر ولك خالص تحياااتي

مبدع ياجماااااااال صح لسااااانك