الـوقـت [ خـيـطٍ ] .... والصـواديـف أبــره !

{ مـواعـيد بـكـــره }

مصافحة أخرى ... علها تشفع لنا طول الغياب



.


خط القلم جرحي - والاشواق حبره
يبقى الرفيق اللي له جروحي تجود



الوقت [ خـيـطٍ ] والصواديف أبره
ومن [ وخـزَها ] كـلٍ وله قسم معدود




دنيا الفنى تلوي علينا ( بمكره )
ضاقت علي ( وخيط ) الايام معقود



مثلي مثل غصـنٍ يضحي بصبره
يفدي ضلاله ( ما شكى حيل مهدود )



أنا المعنى : وانت قصّـفت عمره !
الجذع يروى والظما لاحق العود!


مليت اصارع في [ مواعيد بكره ]
واخيـط فتـقٍ [ للمعاذير ] ممدود



لا ميئسن منكم ولاني بمكره !
فيني دبيب من الامل ماله حدود




الخاطر المكسور يا طول جبره
هذي سنه وسنين ما هب لك نود





ما أحتاج من وقتي تجارب وخبره
اخذت منها اللي مقــــدّر ومشهود




خطـو الـولد لا جاك من دون دبره
مثل الفـشق لا صار ما فيه بارود


مهما يقنن ما يصيب أبه "وبـره
نيشانها دايم عن الصيد مـحدود



اللي قناها ما عرف كبر قدره
يقفي ويقبل والرجا منه مفقود




مشي الفتى يبرى المخاطر بصغره
واليا كبر ما ينلـحق كل مطرود


في رفقت اللي ما ينومسك شبره
ان ما نقص مكيال ما هوب لك زود



من لا يقلّـك وانت في وسط عثره
وقت الرخـا لو جـاك , ما دق عجرود !


خله وتلقى لك بدال الف عشره
يقسى بهم عودك ويقدح لهم عود




لو كثرت العميان لا عاد تشره
تعـبْ المقــدْي ما لقا منكم الفود



سقف الامل عالي - وشيدة جدره
وطماعتي [ فالمتن ما هيب فالذود]



أما وصـالٍ يعتق اللي بأسره
ولآ سجينٍ دونه الباب مـردود !



.
فهد المنصوري

(الدقيس)



.

لو كثرت [ العميان ] لا عاد تشره
تعبْ المقدْي ما لقا منكم الفود

سقف الامل عالي - وشيدة جدره
وطماعتي [ فالمتن ما هيب فالذود]


أما وصالٍ يعتق اللي بأسره
ولآ سجينٍ دونه الباب مردود ..!

ياسلام عليك يافهد حبكة شاعر متمكن

صح لسانك وعلا شانك


تحيتي لشخصك الكريم