كذبة العمر

كنت أرتمي لأحلامي البـِيض لا ضقـْت
وأعيش رحله معْ طواري خيالي
وأرجع على سُود الهواجيس لا فقت
والهَمّ وافي مايدوّر بدالي
شاب الطريق اللي سرَق طفلة الوقت
والدرْب لعبه في يَدَين الليالي
من شـَيبي اللي في كفوفه تعَلـّقت
لعيوني اللي سَهِْرها سمّ حالي
للغرْبه اللي في يَديها توثـَّقت
واللي بها من واقعي ما جرىلي
لجْروحي اللي في خـَطاها تعَمّقت
ولدْموعي اللي جاوبَت عن سؤالي
لدْروبي اللي رحْتها ما توفـّقت
للوقفه اللي عندها ضاق بالي
يافتنتي ذلـّلني الوقت وأشتقت
شوقٍ طغى مالي عليه احتمالي
غالي وانا (كهْل الصبا) عنـْك فارقت
وجيتك وانا(سلطان) وانت انت غالي
ماهو خـَطاي اني معَك بالهوى ذقت
سمٍّ .. دوا ... علقم ..على الروح حالي
وأنا الذي ياكذبة العمر صدّقت
إني نسيتك وانت تسكن خيالي