الخفايا

جديد بجاد ابوديه ( العتيبي ) ..







تحملت يابعض الليالي وراك : صدوف=على الحاضر اللي داربه كذب و وشايه
ظهر فالخفايا عن جديد العلوم حروف=لها كاتب مجهول وعيون قرايه
ظهر والمنايا في سليم العظام اوقوف=اذا ماتعجل كسرها كسر لمرايه
ورى بعدها ماكان لي ناظرا مكلوف=خفايا نفوس الناس ومسايف الغايه
بلاوي زمان اليوم سود بوسط كهوف=عليها الظلام السرمدي والبصر تايه
نطل فوقها جلبابها من لبيد الصوف=عميل يصور كلما شاف لحكايه
بديت اعتبرها شي في خانة المالوف=تشوبه وكم شيئاً ليا بان لك بايه
تمنيت لو غيرت في حالها المنتوف=تمنيت قبل يصير في صيخ شوايه
يلوفه على صلو اللهايب محاله لوف=لا والله يلفه لفّ في بطن برايه
قطعت الجريده ولتوى تحتها الكرنوف=قعد يابسٍ في نخلته مانقص مايّه
تصرفت فيها ماحسبت الظروف ظروف=ولا هقوتي في جذعها يختلق شايه
لويت العواتق ليِّه المقط للمكتوف=وانا ساعدي من دون راسي ومبدايه
اذا ما نرد الكايده والخطاء المردوف=علينا تهون امور والقوم زرايه
ولا همني عند العرب كثرة المصروف=إلهي ويدريبه لو الناس نسايه
متى مابغيت من العلوم الكبار صفوف=بنيت البيوت بكيفتيّ عرف ودرايه
مقام الرجال الفاضله لي مقام ونوف=وانا من صباي لغاية اليوم لي رايه
رفعت لسماها فوق يوم الضعوف اضعوف=على راس مرقاب الوفاء عدل وهوايه
عليها كتبت الطيب والطيبين اتشوف=هذا ساس عنواني ولي صفحة جايه
امد الجزيله واشفي الهاجس الملهوف=واسوق الثمينه سوق من طيب يمنايه
وعهد قد قطعته بين قلبي وبين الخوف=معزة ضعيف وضدة الهون لعدايه
بغيت انظر الماضي ليا الحاضرالمكشوف=يبي عندنا ثنتين تأويل وروايه
يبي واضح مشهود ومجرد معروف=نهار الوغا ويساند الخيل رمايه
اذا الطيب عند اصحابنا ماعليه احسوف=فلا باس لو دفوه في ظهر مشايه
انا خابره ماتملكه باليدين اكفوف=ولا قدره عاقل ولا ساس به رايه
هذا الطيب يوم الطيب ولا الوفا محذوف=اذا ماعليه من الرداء بيت ووصايه

حجز أولي


حيه وحي ماجاب ..


بجاد أبوديه

صح الله لسااانك على هذه الرائعه ( الخفايا ) ..


تحيتي واعجابي
..

امـد الجزيلـه واشفـي الهـاجـس الملـهـوف=واسـوق الثمينـه سـوق مـن طيـب يمنـايـه

مديت الجزيلة

يابجاد

صح الله لسانك

في انتظار جديدك

محمد العتيبي
مشرف منتدى وشعراء قبيلة عتيبه
شكراً اخوي على اطلالتك .. وانا فخور بذلك

فيصل المسعودي
شكراً اخوي على مرورك
أنت وشرواك أهل الجزيله

.:" صح لسانك يابو ديه .:"

فايز الثبيتي ونعم انت عملاق من شعراء عتيبه نظرا للقبيله اللتي هي من اقوى قبيلتنا عتيبه شعرا وموقعك في هذا المنتدى الكبير يوهلك لاعطائي رايك ليت لو كان ذلك مع شكري وتقديري لمجرد مرورك

صح لسانك

شاعر متمكن يابجاد


اتمنى لك التوفيق

محمد الذيابي شرفني مرورك بحق