الصاحب الغالي

§¤°~®~°¤§



الطّيب مثل الطّويل النايـف العالـي
قمّة على ضلـع مـا كـلٍ يعدّيهـا
يرهي بها الأوّل ولا يرهـي التالـي
ويغرّها اللي ما يسمع غير طاريهـا
والنّاس في هالحياة ألوان وأشكالـي
ما يعرف الناس غير اللي يخاويهـا
ناسٍ على ما تمنّـى دِرْع وظلالـي
وناسٍ تجيك المشاكل مـن تواليهـا
النّار لو من قربها يسْلَـم الصّالـي
ما قالوا النّار تحْرِق رِجـل واطيهـا
والحنضلة لو ّ تسقى السكّر الحالـي
وتُغْسَل من الورد ما ربّـي محلّيهـا
وما كلّ صاحب يجي في القلب طوّالي
يا كمّ ناسٍ ما نحفظ غيـر أساميهـا
نعْرِف تواصيف قوم القيـل والقالـي
وسـاعٍ حلوقهـا ووسـاع أذانيهـا
إن جابوا علوم ناسٍ مالهـم والـي
ودّوهم علومنا عـن بكـرة أبيهـا
إن كان ودّك تصير الصاحب الغالـي
خلّك ورى الهقوة اللي فيك هاقيهـا
والله لأنصفك من حالي ومن مالـي
مانيب من طقّـة أُخذْهـا وعطنيهـا
إعرف ترى رفقة الطّيب هوى بالـي
يبيعها الـلاش والرّجـال يشريهـا
وإن كان صحبتك معطِيةٍ خلاً خالـي
صحبة رخا ما تبيّض وجه راعيهـا
واللّه عليّ الحرام إنك مـا تبرالـي
لا رِحْم أبو ساعـةٍ قابلْتنـي فيهـا
من قلب جوّالك إمسح رقـم جوّالـي
ومن قلبك إمسح نواياً كنت ناويهـا
عرفتك أو ما عرفتك ما اختلف حالي
نفسي لا يمكن تغيّر عـن مباديهـا
ما فالـي بفالـك ولا فالـك بفالـي
تلقى من أشكالك أشكـالٍ تماشيهـا
وأدعي لكم بالصّلاح وحُسْن الأعمالي
مانيب هـادي عـرب مالله بهاديهـا
§¤°~®~°¤§

اخوي علي بن مذكر

صح لسانك قصيده تكتب بماء الذهب

هل القصيده من نظمك

لأننا نفخر بوجود شاعر مثلك

ونتمنى المزيد

وأدعي لكم بالصّلاح وحُسْن الأعمالي
مانيب هـادي عـرب مالله بهاديهـا

قصيده جزله صح لسانك و بيض الله و جهك