أبو جبينٍ بالنظر ماتملّه

إهداء للشاعر :مشعل جويبر الجعيد



ياسمكري قلبي تهشّم محلّه=يحتاج له ياسمكري منك تعديل
أنت الخبير وعندك الحل كلّه=يازعفران وياقرنفّل وياهيل
للكيف شرّابه وللسيف سلّه=وأنا أعشق الدلّه وبيض الفناجيل
ليت النجوم المرقبات المطلّه=تبدي على قلبي ليا هوّد الليل
تشوف قلبي يوم جاء فيه خلّه=ماعاد به حيله ولا عاد به حيل
قامت مخاطيف الهقاوي تتلّه=يمكن يحوّل عن كراسيه ويميل
والخوف من غزو الرموش المظلّه=سودٍ على دعج المحاجر مظاليل
خرس العيون اللي عل القلب علّه=يفنى بها جيلٍ ويحيا بها جيل
خطرٍ على شريان قلبي تشلّه=ماعاد يمشي فالدقيقة ولاميل
حسبي على داهمه وإستحلّه=وإستيسره في مبهمات المحابيل
أبو جبينٍ بالنظر ماتملّه=كنّه شعاع الشمس قبل التطافيل
والخد والوجنات في لون فلّه=لون الورود اللي على شاطيء النيل
يابن جويبر لغزنا من يحلّه=لغز النظر يحتاج خبرة وتأويل
فكّر وجاوبني عن أسلوب دلّه=إن كان لك سجّات مع سبّق الخيل
وعن كوكب الزهرة نريد الأدلّه=وكم يبعد الجدي الشمالي عن سهيل


أبو متعب الجعيد

..

.
صح لسانكــ يابو متعب ...
ابدعت ...

صح لساانكـــ

صح لسانك مدد بلا عدد

صح لسانك ملياااااااااار

قصيدة جزلة من راس جزل

لا هنت

لا هنت يبو متعب


نتطلع لجديدك


ودي


احتــــرامي

فكّر وجاوبني عـن أسلـوب دلّـه
إن كان لك سجّات مع سبّق الخيل
وعن كوكب الزهرة نريـد الأدلّـه
وكم يبعد الجدي الشمالي عن سهيل


الله الله

صح لسانك يابو متعب والله يلوم اللي يلومك

وقصيدتك سندتها على شاعر كفو وان شاءالله يجيك رده ونشوفه

تقبل مروري