أغطّي عليكم بالصفات الرجولية سفر الدغيلبي لـمحمد السناني

محمد السناني
سلامي سلامٍ يحترم نقطة التفتيش = معه كرت دولي واحتياطات رسمية
سفر صاحبي في كل ديرة يعرف يعيش = على نجد وألا فالجبال الحجازية

سفر الدغيلبي
هلامرحبا بك والحذر والمخاوف ليش = مادام الرعية يابن متروك مرعية
سفر صاحبك في كل ديرة مجهز جيش = من أجل الطواري والظروف السياسية

محمد السناني
يدوم البقاء بك وأنت تعرف سهوم الطيش = تبا تنهي العالم بسرعة جنونية
أنا وأنت بيدينا قسمنا رغيف العيش = وناجح من التقسيم تسعين بالمية

سفر الدغيلبي
ترا مامشينا بالرشاوي وبالبخشيش = وهذا محرم فالبلاد السعودية
ليا طاح ريشك من جناحي عطيتك ريش = ترا الناس تربطهم صلات اجتماعية

محمد السناني
هذي حاجةٍ ماتقبل البحث والتنبيش = سواء معلنه وألا اتصالات سرية
جنية الذهب صافي ولايقبل التخديش = على فزعتك مافيه حاجة ضرورية

سفر الدغيلبي
الأرسال في جوالكم داخله تشويش = وأثر عذركم سوء الظروف المناخية
أبا أزيد ضرب السيف وتقول لي بشويش = وأبشرك غير السيف شلفاء وجنبية

محمد السناني
هذا أكبر دليل إنك تعاني من التهميش = رسالك قطع عبر الخطوط الفضائية
وقع من يديك السيف من روعة التنقيش = وقالوا لك الميعاد في حرب ودية

سفر الدغيلبي
ليا همّش الطيّب من أهل الردى حتى ايش = يغطّي عليهم بالصفات الرجولية
ليا شفت هرجك زاد قفلتها بالشيش = ويمدي تعوضها بشوطين إضافية

الاحظ على السناني احياناً يعسف المفردات علشان تستقيم مع الوزن


ما في شي اسمه ( رسالك )



اللي نعرفه ارسالك



وجهة نظر لحد يبلشني

محاوره قويه يعطيك العافيه

الاحظ على السناني احياناً يعسف المفردات علشان تستقيم مع الوزن


ما في شي اسمه ( رسالك )



اللي نعرفه ارسالك



وجهة نظر لحد يبلشني


يمكن خطاءكتابي

يمكن خطاءكتابي

لابالله ماهو خطأ كتابي نطقها رسالك بدون ألف لأنه لو قال
إرسالك قطع عبر الخطوط الفضائية
أصبح البيت مكسور

الوزن مستقيم كذا يا حمدان ما اتوقع فيه خطأ في النقل

الكلام على المعنى

اذا كانت الحاورة قريبة اعتقد أن الرئيس اليمني زبدة الموضوع

وجهة نظري ونسمع منكم

محمد السناني
هذا أكبر دليل إنك تعاني من التهميش = رسالك قطع عبر الخطوط الفضائية



سفر الدغيلبي
ليا همّش الطيّب من أهل الردى حتى ايش = يغطّي عليهم بالصفات الرجولية


الله اكبر عليك ياسفر الدغيلبي

بيت يكفي عن المحاوره كلها

محاوره قويه يعطيك العافيه

والشاعر سفر ((( السلطه )))

سلطه ربه على الشعار شعراااا لا غير

,’



الله عليك ياقاسي مازلت مبدع

بيت يُعتبر حكمة


ليا هِمّش الطيّب من أهل الردى : حتى ايش؟! = يغطّي عليهم بالصفات الرجولية



أما الملاحظة على كلمة (رسالك) أنا أقول مثلها مثل كلمة (براهيم) ، واعتقد كثير ماتُحذف الألف من أجل الوزن ، ولكن المهم تكون الكلمة مفهومة



صح الله ألسنتهم ولاهنت أخي / صاحب الموضوع

المحاورة .. عن جد ... ممتعة من قبل الشاعرين ..

... ولكن ...
.... ... سفر الدغليبي .. ..
مبدددددع ليس هنا .. فحسب
بل أينما أنوجد ..
والحقيقة ..

.. يستاهل إن يصنف ضمن أحد أقطبة نجوم شعر المحاورة بالساحة الشعبيه ..

أحترامي

محاورة مميزة جدا وتغني عن الكثير من المحاورات

فيها ابداع وندية ...من الشاعرين الكبيرين

وبيت سفر فعلا مميز جدا ولايشبهه الا بيت حبيب في محاورة الشيخي (اول مايقلط على صحن الكريم الضعوف ههههههه)

اما المعنى فهو يركب على كم رأس عربي بس الجبال الحجازية يمكن ترجح كلام الغالي السفراني

تحياتي للجميع

السناني متجدد في عطائه .. قوي اينما حل و ذهب


لله درك يا ابن متروك


ولا هنت على المحاوره

المحاورة جديدة ؛ جرت في عيد الفطر



مشكور على الطرح والمحاورة الجميلة