::..المحايا اللي مضاربها عطيبه ...::

السلام عليكم ورحمة الله وبركاته

مساكم الله بالخير

هذه قصيده تشرفت في القاءها في أجتماع فخذ المحايا من النفعه وذلك لدعم ملتقى مزاين أبل عتيبه

والله يوفق الجميع






فاح صدري وأنتشى عوده وطيبه = وأظهر اللي مايجيبه كود غالي
أظهر اللولو ومسك (ن) ينتشيبه = وأظهر بيوت(ن) مثل عذب الزلالي
ثم سرت مع هاجسي طوع ورغيبه = عارفه منزالها بروس الطوالي
ياقصيدي هات وعطني ماتجيبه = خابرك ماتعطي الا من الجزالي
شاش رأسي يوم أبمدح في عتيبه = عزوة(ن) مع مدحها برمي عقالي
عزوة(ن) أتبرك الأمجاد طيبه = مثل تبريك الفحول من الجمالي
ماخذينا مجدنا حكي وطليبه = ولا كسبنا مجدنا بكثر الجدالي
كاسبينه في السنين اللي عصيبه = بالبنادق والفشق تال الليالي
وأنشدوا واد الرشا ولا شعيبه = ثم يجاوبكم على قد السؤالي
أنتزعنا نجد بالروس الصليبه = والسيوف اللي تنومس بالقتالي
ثم تربعنا على عز(ن) وهيبه = هيبة(ن) تخضع لها أرقاب الرجالي
لارضينا تصبح الدنيا عشيبه = بعد وبل(ن) هيضه شوف الخيالي
ولازعلنا نلطم وجيه(ن) شهيبه = ولاتهم ولوها كبر الجبالي
ذا وأنا من لابة(ن) تهوى الصعيبه = ترتكي لحمول مافوق الثقالي
المحايا اللي مضاربها عطيبه = تارد حياض المنايا ماتبالي
في نهار الغاره والنار اللهيبه = ننطح أعدانا ونصلاها بصالي
لين يلعب ذيبنا ونسمع قنيبه = والحريب نفهمه درب العدالي
سطر التاريخ الأفعال العجيبه = من مضارب لابتي طوال الحبالي
لين جاء عبدالعزيز الله يثيبه = وأنطفت نار الجهل ويا الظلالي
وحد الدوله بسيف (ن)ينرضيبه = لين تخاوا كل جنوبي مع شمالي
ثم نعمنا تحت الأشجار الرطيبه = في ذرى حكامنا كرام السبالي
وختامها صلوا على اللي نقتديبه = الرسول اللي قطع رأس الظلالي

صح لسانك يالمحياني
وكفووو يابني عمي

ألاد الكريزي


صح بدنك وماعليك زود


ومشكور على المرور

ماخذينـا مجدنـا حكـي وطليبـه
ولا كسبنا مجدنا بكثـر الجدالـي

صح لسانك ياماجد
ولاهنت

صح لسانك وبيض الله وجهك على القصيدة ..

دام عطائك ..

ولك كل التقدير..

أمروء القيس



صح بدنك والله لايهينك على المرور الطيب