قصيدة الوجــــد : للشاعر : شبيب شافي الملعبي

وجدي عليها وجد نمر بن عدوان =
اللي تعلق في غرام الكحيله
صكت عليه القوم من كل الاوطان =
ولاله على سود الصواديف حيله
صفا ينقيله من الدر الاثمان =
وعمه يناوله العلوم الرذيله
وبينه وبين حمود شعله ودخان =
وقلبه عشق وضحا فلاح السبيله
بنت لها في رايعت نمر ريضان =
تشبعبها الفاطر وترعى ثميله
قفرن خلا ماداج ريفانه أنسان=
توه من الوسمي منديه سيله
تلقى الخزاما ريحته مسك ريحان=
وعليه من نبت البختري حصيله
وتخالط النوار من كل الالوان=
وشيحن تمايل فوق غصنه نخيله
وساقي غديرن ماعثر فيه بدوان=
لاشافه الضميان زهب صميله
منزال شيخ له بوسط الملا شان =
لاطاح حمل فلان حمله يشيله
غيث الجموع بيوم تغتر الاعيان =
يوم أنتخت فيه الهنوف الجميله
وأومى يتل عنان غالية الاثمان=
لاسمعة اطبول الحرابه تجيله
في ساعتن راع الهرابيد ينهان=
تقطع رجاويه السيوف الصقيله
صاح النذير ودارت الخيل الامتان=
وثار الغبار وشاش فوق الاصيله
وميل على الفريس صايل وشامان=
يوم الرماح تطيح بأتلا شليله
وحط السبايا خلف والنصر نيشان=
وقامت ربوعه تعتزي بالقبيله
وجاته جموع القوم وعيال شيحان=
وشبت على البيدا زناد الفتيله
قرمن مضريها على قدر الامكان=
زيزوم قوم ولايحب الفشيله
على العدا سقم وللنصر سلطان=
وشوق يعذب ضافيات الجديله
وأنا ظلوعي تسطلي فوق بركان=
وعيني على برق الشمال وتخيله
يوم مريض ويوم ضايق وزعلان=
وملازم التفكير في كل ليله
ياكثر ما اسهر والسهر وين ماكان=
وعجزت من عد الليال الطويله
أقول باكر يفرج الضيق رحمان=
وطالت دعاتي والليالي بخيله
مغير أهوجس واكتب أثقال الاوزان=
وكن الحشا بأقصاه جمر المليله
على وليفن لاعني يابن جودان=
أقفى كما تقفي الضعون المحيله
أنشهدني عقب فرقاه خسران =
خسارة في العمر ماهي قليله
الشاعر : شبيب شافي الملعبي