حجه مفلوجه . !

.
.
السلام عليكم ,,



جمر الغلا شعله وله نور وهّاج=أشعل لهيب الشوق في حاني العوج

له باب مدخالٍ وله باب مخراج=وباب الخروج يشيل فوج وراء فوج

لكن من دونه عراقيل واسياج=وحصن تصاهل بالإعنّات واسروج

تمكّن وسهمه بوسط الحشا لاج=حرارته هي هي في قيض واثلوج

لا يابعد من يلبس الماس والتاج=ولا يابعد من حطن الكحل والروج

فتحت لك قلبي مثل فتح الأدراج=وصدري وطن واطلال واديار وافجوج

مفروش لك حريرٍ ابيض وديباج=ومن اول ضلع لأخر ضلع سيّر ودوج

في ذمتي إني لشوفتك محتاج=حاجة غريقٍ طاح في غبّة الموج

أمواج من تحته ومن فوقه امواج=وتشيله اليا شالها عاتي الهوج

همّه من الدنيا تجي لحظة افراج=لاتنظر العينين والسمع مصنوج

وش داعي الهجران وش داع الإحراج=وسلك الغرام بسلك الأحزان منسوج


الكون مظلم وانت في كوني اسراج=وأدعي لعل يأتي من الخالق ابروج

لاخاطرٍ يجبر ولاضحكة احجاج=زارع ولاجاء للمحاصيل منتوج

سرّيتني من دون مسرى ومعراج=وأصبحت لاعاقل ولاني بمرجوج

مغير أسيّر فالديّر تقل دوّاج=وأشيل في صدري غرابيل واهروج

جيتك بحجة حق والحق فلاّج =وعوّدت من عندك وأنا منك مفلوج !



وسلامتكم ,,

الله ياجمال الفكر والابداع




صح لسانك "

صح لسانك ياجمال

تحيتي وتقديري

صـــح لسانكـ

يسلام ياسلام على هلابداع

صح لسانك على هذه الابيات الراقيه

فتحت لك قلبـي مثـل فتـح الأدراج
وصدري وطن واطلال واديار وافجوج


صح لسانك يا جمال