طلب ضيف محاوره شعريه
حمود الحمود01-Sep-2007, 10:27 PM
سلام الله عليكم ياهل الهيلا رجال الجود /كعام الضد مروية السيوف ودمها فيها
زبن المجنا01-Sep-2007, 11:49 PM
عدد مالاحت بروق المخايل يالحمود حمود - هلا يامرحبا والنار تحرق رجل واطيها
حمود الحمود01-Sep-2007, 11:57 PM
هلا يامرحبا والطيبين نعدهم في زود /مثل زبن المجنا والمقرد ماندانيها
ماله امان01-Sep-2007, 11:58 PM
هلابك يامسلم وانت رجال ٍ وسيع بنــود=تعد النور والطالات ربعي ماتخليهــا
لكنك مابنيت البيت فوق البيت يامحمــود=قصرت السالفه دون البويت اللي تسويها
ماله امان02-Sep-2007, 12:02 AM
الاخ زبن المجنا انا اسف دخلت بالرد بعدك مباشرة ولكـــــن واصل
عساك على القوة انت وزميلك الحمود0000
انا متابع،،،،،،
حمود الحمود02-Sep-2007, 12:20 AM
علامك يوم تشناني وانا اللي باذل المجهود/اصيد الصيد وواكل رفيقي من ثناديها
لكن مااقول غير الله يعين وماعليكم زود /وببني قصر ٍ بويتاتك انته مايحاليها
حمود الحمود02-Sep-2007, 12:39 AM
وينكم ياخويانا ابطا الرد ماجاني
زبن المجنا02-Sep-2007, 01:02 AM
لفيت الدار يالطرقي ولا تخشى من المنقود = كلامك فيه شكهّ والنوايا ماتصفيها
ترا حمل الجمل يالربع مايبركله المفرود = وبعض الناس ماتسمع ولو انك تناديها
حمود الحمود02-Sep-2007, 01:21 AM
لفيت الدار يازبن المجنا والجميع شهود/اسلم والرجال اللي تسلينا نسليها
وحملي يالمجنا شايله واخذ عليه عهود/وناس ٍماتسمع لوتنادي من يقديها
عبد العزيز العطياني02-Sep-2007, 01:38 AM
الا يامرحبا ياحمود لا هبت هبوب النود
بيوتك وافيه وانته بمدح الربع موفيها
لكن المشكلة ياحمود في سم الافاع السود
تموت الحيه ام جنيب لكن سمها فيها
حمود الحمود02-Sep-2007, 02:03 AM
هلا بك يالعطياني ردودك طيبات بزود/واهلي بالردود الطيبات اللي مسويها
الافعى طايحات سنونها ماعاد فيها فود/ليا طاحت سنون الحيه تضيع هقاويها
حمود الحمود02-Sep-2007, 02:18 AM
بيض الله وجيهكم اخواني زبن المجنا وماله امان وعبد العزيز العطياني ونستونا الله يبارك فيكم وشكراً على استضافتكم الحلوه والى لقاء قادم ٍباذن الله والسلام عليكم ورحمة الله وبركاته
زبن المجنا02-Sep-2007, 03:14 AM
دخلت بسوق الاسهم من قرادة حضي المقرود = خسرنا ماكسبنا بين بايعها وشاريها
والله مدر ي محاورتكم وش تسمونها هي رباعيه والا ثلاثيه والا متوازية الاضلاع
اول شي مشكور ياللي ماله امان وعذرك مقبول ولاحصل اي قصور
وثاني شي يالحمود مشكور لو اني اشره عليك في نقاط ودي ابينها لك :
المحاوره تكون بين ثنين لا ثالث لهم وكل شاعر متمكن يقدر يلعب مع سبعين شاعر في وقت واحد لكن اساسيات المحاوره تكون بين اثنين يعني مهوب لازم تطمر الجرفان نوب ترثع مع هذا ونوب تناحي هذا ونوب تلبه مع هذا والدابه الدابه في الشطر الثاني في البيت الثاني والله اني ادير الفكاير فيها واخرا وليس اخيرا اشكرك بعنف على حسن تواضعك واخلاقك الراقيه وتشرفنا باللعب الثلاثي المرح مع حضرة جنابك
واخيرا
العطياني اللي متنحرن الهوا وين انت ساري لاعودت كن ماقدامك احد يحتمي الماقف ؟؟ ارجو ان لا تكرر هذه الكارثه مرة اخرى
ودمتم سالمين
أسامة العتيبي02-Sep-2007, 09:50 AM
لفيت الدار يازبن المجنا والجميع شهود/اسلم والرجال اللي تسلينا نسليها
وحملي يالمجنا شايله واخذ عليه عهود/وناس ٍماتسمع لوتنادي من يقديها
الهيـــــــــــــلا *** منتدى قبيلة عتيبة
« آخـــر الـــمـــشـــاركــــات »
