من اشهر روائع الشاعر الكبير نمر بن صنت الحافي العتيبي ( مميزة ****)

هذه من قصائد الشاعر نمر بن صنت الحافي العتيبي وهي نادره وقد استطعت ان اجمعها وليست كامله ، وارجوا ان تحوز على اعجابكم ، وبأذن الله تعالى سأبحث عن المزيد لهذا الشاعر الكبير.

يامل قلب تتله بالهوى شيعه
تلة دلي الحفر لاشالت الجمه

الطرش مضمي يذودونه قراريعه
في لاهب القيض والبدوان ملتمه

كني يتيم يعاجنه مراضيعه
استنكر الديد من فقدة حليب امه

يرضع صناعي قليلات منافيعه
الليل مايمرحه من ولية العمه

ادمية حدها الرامي على القيعه
الشمس قدامها والريح من يمه

عين اشقر لوحوا له عقب تجويعه
بين له النسر والداعي رفع كمه

القرن ذيل اشقر تلوى مصاريعه
يوم ان عج الرمك غادي كما الغمه

وادي الرشا والهييشه من مرابيعه
وخشم المضيح وبطن غثاه والحمه


وقال ايضا هذه القصيدة الرائعة الغزلية :

ياعبيد انا كني على الرجم مرصوص
مبداي في راس الطويل أتشفق

شفق على اللي خاطري منه مبخوص
هرج الرخا من صاحبي ماتوفق

انا على عقلي من الترف منقوص
وعقله رزين اليا هرج لي ترفق

ياتل قلبي تلة الهجن مرهوص
تلة عقيد وبالركايب ملفق

تلة مناكيف على حزّب عوص
واللي على عوص النجايب مطفق

من عنز ريم حازها زيلة قنوص
لاعورجن قبل الجميله تصفق

دار سكن في جانبه حصة الغوص
عليه بدري السحايب تدفـق


وقد بعث قصيدته الشهيرة التالية الى الامير خالد السديري ينصاه للتوسط في زواجه من محبوبته ، وقد كان من اخوياه وتحقق له مايريد وتزوج واصبحت اما لأولاده ، بفضل الله ثم الأمير خالد ، يقول :

يانجمة الصبح كبدي منك مرهوقه
لاشع نورك علينا لاتغـيـبـيـني

ستاير القلب من فرقاك مشقوقه
اصبر من العام لين انك ذبحتيني

الود لو نتركه عنا وطاروقه
أظني ارتاح وانتي تستريحيني

لبيك يااللي تجر القلب بعروقه
كله على شان يوم انك تلبيني

تلحني لح ركب عجلوا سوقه
او جل ذود مسريهن شيابيني

عديت عن مبسم المجمول لاذوقه
انا بلاي الحيا وادرا على ديني

وا قلب يااللي من الجازي دنا عوقه
بالله شيروا عليها لاتـقاصيني

وان كان قلبي تلبش عنه صندوقه
شدوه لين أتجود فيه بيديني

قالوا معاليق قلبك منه مسروقه
قلنا خذته الضحى والناس واعيني

ياليت ربي ومر (خالد) على شوقه
يفك حبله ولو يعطي ملاييني

الأوله ليت ابو خلي من الروقه
والثانيه ليت ابوي من القحاطيني

يالله ياخالق الدنيا لمخلوقه
تقدر على الموت تذبحني وتحييني

تلم شملي لابد الروح مرفوقه
باربع هناديس في قبري تخاويني


ارجوا ان تحوز على اعجابكم … وارجوا من يعرف عن اشعار هذا الشاعر الرد ، ولكم خالص الشكر
-------------------------------------------------------------------
زماننا غير زمانهم وحتى نتذكر الاولين
اخوكم ابن نجد

ابن نجد
تسلم يمناك ويعطيك العافيه وصح السانك والسان الشاعر نمر بن صنت الحافي والشاعر خالد السديري ومشكور على الاختيار المناسب والجيد
تقبل تحياتي