(((( مشاعر القسامي ))))

بسم الله الرحمن الرحيم

السلام عليكم ورحمة الله وبركاته

اخواني ابناء قبيلتنا الكبرى اعضاء منتديات الهيلا عتيبة

مشاركتي هالمره بمشاعر قسامي وموجهه الى كل قسامي بعينه

بقلم ابو راكان القسامي

مدير عام شبكة ومنتدى قبيلة القساسمة


خيل سحاب الصيف في تالي عصير // بامر الله المعبود منشى الغمامي

في مقدمه برق الحيا والتباشير // فيه الرعد يرجف ويرزم إرزامي

واليا إستهل مزنه وهل الشخاتير // سيله مع الوديان غطى الزوامي

منهو يشوفه قال يالله عسى خير // يالله عسى فاله يجي بالسلامي

يمسي على الشبرم وذيك المغاوير // يضفي على جوه سواة الظلامي

يعل وبله لين يطم العثامير // عقب البطى يرو الكبود الضوامي

فاله سماك الصيف قشع ونواوير // عرفج وعجله قرنوهـ والثمامي

ومع النصي شرشر ونبت المزاهير // يبلش بها العساس كثر الأسلامي

هبت هبوب النود ريح المعابير // وفاحت زهور العشب منها إتوامي

ومع ام سالم غردن العصافير // يطيب لي معهن اودي سلامي

ينصاك مني يا زبون المخاسير // ياللي لك البيضاء بروس العدامي

سلامن أحلى من حليب المباكير // وعدهـ لين جسام ريف الضيامي

ذخر الرجل اللي تقود الطوابير // حسامة الموقف بوقت الحسامي

يومنها ما بين فزاع ومغير // بانت فعول اهل الفعول الجسامي

بانت على منجور بليا مخاشير // من فعلهم جسام تروا السهامي

وقدمه نهار العصلا ذلو جبابير // من جزل الأرياء ثوروها عسامي

يوم الطلب يوم العزاوي محاضير // أهل النخى والهوش والعلم حامي

أهل الرمك وأهل السيوف البواتير // جساسمه إمتيهين الجهامي

الصاع وافي ما يجي فيه تقصير // كم شيخ قومن راح راسه عدامي

مع سربةٍ خلوا أهلها شعاثير // عشوبها جوع السباع الحوامي

اهل الكرم وأهل الدلال المباهير // ذباحة الحايل غزاز السنامي

هم لابتي جسام إحرارن مواكير // ولابه قصورٍ فالقبايل شمامي

تاريخهم سطر به المجد تسطير // تشهد عليه غبر السنين القدامي

راحوا عساهم للجنان المناوير // والله يبارك فالبقى والنوامي

أنتم لنا ذخر الليالي المعاسير // درع لنا وقت الشدايد حزامي

وانتم ذرانا مثل أبانات والنير // بعد الولي يا معريين المقامي

وسط الحشا إلكم معزهـ وتقدير // قدرن تعلى فوق راسي وحامي

ما أوفيتكم لوجبت جزل التعابير // يفني قصيدي بالورق الأقلامي

وشهو قصيدي بالمدح والمفاخير // لصار ما هو بالربوع الحشامي

احدن شعى قلبه بجمع الدنانير // يبا الخزاين مبهـمان اللحامي

واحدن شعى قلبه بيض الغنادير // حور العيون إمرودعات الوشامي

وحدن شعى قلبه صفر ومغاتير // طوال اللواحي فاهقات السنامي

كلن على ما قيل غاية وتدبير // ولاني بملحقهم ياخوي الملامي

قلبي شعاه إدياركم يالمناعير // إديار قومن لي خوال وعمامي

من ضلع الأصفر لين حد المجيدير // ومن الطرودي لقرنين الزوامي

احبها واحب فيها المسايير // واحب ادوج إبها وسج الأقدامي

احبها حب المطر والمخاضير // حبن لجى وسط الضلوع الهيامي

أحبها يا خوي من عادني إصغير // حبن تربي في حشايه وقامي

إمعاهدينه يسكن القلب ويصير // اليوم ما ضيله ثلاثين عامي

لبطيت عنها كني مذهب مداوير // فكرهـ مشوش بين شرقن وشامي

إلها يحن القلب حن المصاغير // حن البطى لجت خلوج ابن لامي

يا كثر ما غنيت ابيوت المشاهير // بيتـن حفظـته عن رشيد الزلامي

يا منكرن دارك عليك المعايير // يومن لحب الدار يوفا الكرامي

وقدمه رجالٍ في السنين المغابير // حب الوطن متقلدينه وسامي

يا خوي لو عنها حدتنا المقادير // يبقى غلاها بانين له خيامي

ويبقى قصيدي شاهدن بالتقارير // عليه توقيعي وبصمت إبهامي

تمت وصلوا عد ما غرد الطير // على النبي واعداد نوح الحمامي


اتمنى ان تعجبكم ودمتم كما تحبون

رائعه رائعه

صح لسان القسامي على هذه الفذه الفريده ..


لاهنت على النقل


تحيتي
...

تسلم اخوي محمد

اسعدني مرورك ولا هنت