بنات الفكر : قصيدة للشاعر/مشعل الشيباني

ياجزيل الشعر جاوب لازهمتك لاتحايد =قل نعم للي ينادي ياجزيل الشعر قل له


ودنا نقطف ثمرك اللي زها خضر الجرايد =ودنا نسقي كبود من ظماها مضمحله


ياشعر لا تبخل بجودك على من جاك رايد =اعطني من بعض جودك ما الزمك بالجود كله


في بحورك ماسبحنا كود لجزال القصايد =والهزيل من القصايد نرفضه دقه وجله


شاعر بنات فكره ماتجي له بالفرايد =احسن ينوخ ركابه عن طريق ما تدله


كم نشوف وكم سمعنا كم قرينا في الجرايد =هرج يلبس لباس الشعر تنشره المجله


شاعر ما ينبني شعره على جلب الفوايد =وش محل الشعر يوم انه يقول وش محله


ما يحصل من وراه الا تشراه ونقايد =يمكن يقال اشرب الما بعد شعرك ما تبله


للشعر عقد فريد ينظم نظم القلايد =لو بغى شخص يفله ما استطاع انه يفله


والمشاعر ما تحرك كود في وقت الشدايد =لاشتعل نار الحشا منها وفارت فور دله


وانتثر قدمك جواهر اختر ونق الشرايد =لين عقدك لانظمته مايجي لك فيه خله


واترك وخل وتباعد وابتعد عن الزهايد =خل عنك الطامن من الشعر والهزلان خله


والمشاعر موج بحر في الحشا يحتاج قايد =يغترف منه الفريد ومن سما فكره يزله


لا رعد سحاب فكره جت لك مزونه تهايد =يشرب الظامي عطش منها وماها ما يمله


والشعر لو ينشدونه قال محتاج لضمايد =ابتلاني بعض ناس مالهم في الشعر مله


القوافي وزنها للمستمع ناقص وزايد =والمعاني هابطه والوضع يبغى من يحله


مثل ما نبدى نختم القاف ماني بمتحايد =قل نعم للي ينادي ياجزيل الشعر قل له


مشعل بن شباب العتيبي

تشكر على القصيده الرائعه

صح لسان شاعرها وسلمت يد ناقلها


بيض الله وجهك يالقسامي

مشكور وماقصرت