اخوي طاب الكيف له وتعليل

هذي قصيده لشاعر الوجد سويلم العلي السهلي رحمه الله

وهو غني عن التعريف






أخوي طاب الكيـف لـه والتعاليـل = صدره وسيع ولا تجيـه الهمومـي
لوا هنيـه لـه شبـوح ومراسيـل = ونا اشبوحي مـا تجيـب العلومـي
والبدو شالـوا نوهـوا بالمراحيـل = وكل ركض للزمـل شـلاّه تومـي
أحد يخم العلـق يخطيـه ويشيـل = وأحد تقلل مـا بقـا لـه لزومـي
وشالوا وقفن الضعايـن زعاجيـل = وشفوا وهفوا واتقـوا بالحزومـي
وأنا بمرقاب الشقا عينـي إتخيـل = في راس مرقاب ٍ طويل الرجومـي
أخايل الأضعـان واقفـت مقابيـل = إستقبلـن اظعـون زاه الرقومـي
وايّست من دعّاج الاعيان بالميـل = ولا لي على ناب الردايف سلومـي
وا هجر قلبي كان هو طاول الطيـل = عز الله إنـي مهجـل كـل يومـي
إهجال من تاهت عن الذود بالليـل = مابين سرح لـوارد الجـو تومـي
الولف بلوى بـه هبـال وهرافيـل = لولا الحيا راعيه يرمـي الهدومـي
يا لا يمي جعله بحسـر وغرابيـل = الله يبـلا بالبـلا مــن يلـومـي
عسـاه بالدنيـا قليـل المحاصيـل = وبا لآخره يسقى حميـم وسمومـي
وجدي عليها وجد من له مراحيـل = حيلٍ وخلفـاتٍ تـدوس الوسومـي
وعشايـر شقـح تـلاد ومخاليـل = ومعهن على شقران فلـوٍ قحومـي
سبّرْ لعجمـانٍ علـى كنـسٍ حيـل = شيب المتون عيونهن تقـل لومـي
كل أبلـج ضـارٍ لكسـب التنافيـل = ضرما يبون المال ما فيـه لومـي
وغارة عليه القوم خيل ورجاجيـل = وطبّحْ على فلوٍ حشـورٍ عزومـي
واقفا يرادي به عن الخيل حلحيـل = شذرٍ حذرْ تالـي شيـوخٍ اقرومـي
واقفوا على ذوده عصـاةٍ مشاكيـل = وكلٍ على حقـه شحـوح بحومـي
وصله وخلا العـج مثـل المخاييـل = عج الرمك والبـل مثـل الغيومـي
يبي يداري هرجة القـول والقيـل = أحضر حياه ولا بنفسـه وهومـي
وطبّح له اللي ضـاريٍ بالمحاويـل = وثارة الى ان حذاه مثـل النجومـي
واقفا مـذل مـع دكـاك الغراميـل = يفرك يديـه ومـرْ كبـده يزومـي
عقب السعد والعز والبـن والهيـل = وكبشٍ مربينـه لكـل امحشومـي
اليوم يسهر كل مـا جرهـد الليـل = ودايم على غيضه صنوتٍ كضومي
هذا وجودي وجد من لـه مواحيـل = من عقب ماهي ذود صارت اقسومي
أو وجد من صدر على اربع محاحيل = لها إليا غـاب الرقيـب امعلومـي
صدر على اربع مايـةٍ كلهـا كيـل = حبٍ حمر تسقـي نواحيـه كومـي
أربعْ عقايبها اربـعٍ كنـسٍ حيـل = يشيلن الما فـي وسـاع الكمومـي
يوم استتم الزرع شال النمـا شيـل = نشتْ بردها كبـر روس البهومـي
وهلّلت على وسط المفالي هماليـل = وصارة على روس النواحي رجومي
واللي بقا من حبها شالـه السيـل = غثو السبل بالسيل مثـل الهدومـي
واصبح يصيح ويزعج الويل بالويل = عن نول ما جابت يديه امحرومـي
الله يكفينـا شــرور المخايـيـل = إلا عطا الرحمه كما انـه رحومـي
ما قلتها باللـي تعـرف التهاويـل = ولاهي من اللي يجمعـن العلومـي







تحياتي فتى السهول

رحمة الله عليك ياسويلم العلي وسكنك فسيح جناته
والشعر مب مستغرب عليكم يالسهول ياطحاطيح الرياجيل
الـولـف بـلـوى بــه هـبـال وهرافـيـل
لـولا الحيـا راعيـه يـرمـي الهـدومـي
الله الله انا اشهد انه جابها على الجرح الله يرحمه
وتقبل مروري

ولد الهيلا معليك زود يا الغالي من طيب اصلك يا ولد الهيلا وما سميتو الهيلا
عبث رحمة الله ع سويلم العلي ومشكور يا الغالي ع مرورك العطر

الله يرحمه ولاهنت يا فتى اخترت فاحسنت الاختيار

ابن صنهوت مشكووور يا الغالي ع المرور

منوووووووووووووورين

فتى السهول

اشكرك على حسن الاختيار

رحم الله الشاعر وجميع أموات المسلمين تقبل تحياتي

شكرا على النقل الجميل يافتى السهول