مجاراة بيني وبين الشاعر الكبير : سعد بن علوش القحطاني أرجو ان تنال استحسانكم

الشاعر : سعد بن علوش القحطاني يقول :: 👇🏻👇🏻




البارحة فكري للابيات طربان
وقمت اتخير للنشاما قصائد

وانا على القيفان ياعيد خرمان
لاجات من مثلك إجزال القصايد

جتك القصايد يالذيابي بالألحان
من شاعرنً راْسه يعيف الوسائد

ياعيد في صدري من الوقت بركان
وان كان ثوّر أعلنته الجرايد

من ذالزمن ياعيد عايف وقنعان
الذيب جائع والثعل فيه صائد

لانيب لا جائع ولا نيب عريان
والعمر ولىّ مابقى الا الشرايد

وقتنً برك بجمال ذربين الأفعال
اللي يجيبون العشا والفوائد

وزانت لمن هو في حوي ام عثمان
وراحو بها اهل الشيم والعوائد

والنذل جاله ياابيض الوجه جنحان
وسط النخل ياعيد يأمر وسايد

وشرى العمائر والأراضي ودكان
وبعض العرب صكت عليه الحدايد

والسر بحته بالاشارة على شان
حيثك لفهم القاف يالقرم رايد

واليوم ياشوق الغضي خدر الأعيان
غرونً زها لَبْس الذهب والقلائد

بنت الشيوخ اللي لها بالزمن شان
ريمنً من القناص دايم يحايد

وانت الذي بالطيب ياشيخ عنوان
وانت البطل لاصار وقت الشدايد

وختامها ياعيد مسكنً وريحان
من شاعرنً ماهو على الناس زايد

والك السلام إعداد ماهلّ ودّان
قاله سعد وماراح ماهوب عايد




@@@@@@@@@@@@@@@




وهذا ردي 👇🏻👇🏻:

حي الجواب اللي من الفكر مليان
مايبدع الا من جزيل الفرايد

شاعر وآله في قمة المجد صيوان
حرّن على المرقاب ضاري الهدايد

جرّ اللحن فالشعر من كل الألوان
وثبّت قديمات الشعر والجدايد

مطنوخ راس ومن سلايل كحيلان
لامال فيك الوقت حلّ العقائد

واترك زماننً مايجازي بالإحسان
إبليس فوقه ميسم الحقّ جايد

أرج الولي فوقك ولو كان ماكان
وخلك على بلواك يالحرّ كايد

لايطرحك وسواس بقعاء للأعيان
اطرد وساويس الحقد والحسايد

أن شفت لك مجنون في كل الاوطان
أغسل منه يدّك بصابون تايد

واعلم ترى رزقك مهو عند الانسان
اصبر وكافح ياوسيع البنايد

السرّ وسط البير باني له أركان
ماابيح سرّك لو تجيني نكايد

أشدت لك بأبطال وأمهار فرسان
وبخيت قدامك بما قلت شايد

مدح الاصايل حق والحق ميزان
أخذ شهادة عن جميع الشهايد

في بنت شيخنً فعله يشدّ الاذهان
للمرجلة صائد وبالفعل قايد

حنّا عتيبه لا زمى كل نشطان
في سلمنا نشعل عليه الوقايد

وقحطان لاقالو هل المجد قحطان
رجّالهم يكسب جزيل المجايد

لفعولكم عندي دلائل وبرهان
منكم ولد فايز حزام وسنايد

مهذل زعيم القوم في وسط ميدان
عسى حياته للعرب في مدايد

وختامها تلقى مع الشكر عرفان
دامك على سلوم العرب لك حصائد








عيد الذيابي ........

حنّا عتيبه لا زمى كل نشطان
في سلمنا نشعل عليه الوقايد

وقحطان لاقالو هل المجد قحطان
رجّالهم يكسب جزيل المجايد

صح لسانك يالذيابي

صح بدنك طال عمرك