دخيلك لاتخليني مع الونّات وتسافر

حبيبي وإن تركت أحلى الطيوف بليلي الساهر=أنا فدوه لنظر عينك إذا ليلي تغنابك
تثاقلني الغياب اللي أشوفه طايلٍ قاصر=ولو كانت على شوقي يذوب الشوق ما جابك
جمعت حسابي لعذرٍ يطول وينصف الشاعر=طلعت بحسبتي قانع وتهت إلحين بحسابك
تصدق..ماقويت أبعد ولو قدامك أكابر=أتوق لمسة إيدينك قبل ما تهدي عتابك
دخيلك لاتخليني مع الونّات وتسافر=أنا من لي بعد شوفك يعوضني عن غيابك
أحبك والله العالم..أحبك والله القادر=تهاديت برضاي وما وقفت إلا على بابك
عناوينك مداراتي نهاية حظي العاثر=متى ما جيت من يمي وغشاني ريح أطيابك
أضيع برق همساتك واهيم بحسنك الساحر=وأنا من بين كفينك قبلت أموت بأهدابك
عيونك يابعد عمري علىّ الناهي الآمر=تبين الرحمه بقلبك ورمش العين عيّا بك
يغار من الحكي عنّك خيالٍ موجه الهادر=تصب فيه الشرايين وتطير بفاله أسرابك
حبيبي والليالي بيّنت ما جال بالخاطر=كثر والا كبر ما زانت الألوان بثيابك
عجزت أسلى من أوجاعي وهان الدمع بالناظر=تفضل هذي دموعي تكيل الوجد بترابك

صح السانك يالذيب