6 / من العود ولد العود الان كتبتها لولدي

يا عبيد
والله كفو رجال من ظهر رجال
ولا فيك والله يا وليدي قصوري
وانته على يمناي ما احطك شمال
تسدني قي غيبتي عن حضوري
لقولك وقفت إكبار وإعزاز وإجلال
وصلتني يا أبوي قمة سروري
ومن الفرح دمعي على الخد همال
اليوم دورك وانتهى اليوم دوري
أنا اشهد انك رجل في ثياب الأطفال
حماك ربي عن جميع الشروري
يا أبوي أنا لي فيك أحلام وأمال
ويا الله عساني صادقاً في شعوري
ويا عبيد أنا بوصيك قدام الآجال
والله ما تندم إذا طعت شوري
الاوله بالله لا تقطع اوصال
يدخلك جناته نهار النشوري
والثانية خلك وراء العلم رحال
بدد ظلام الجهل فالعلم نوري
والثالثة خلك على الدرب لو طال
درب العلاء يبغى كفاح وثبوري
والرابعة لا ترهن النفس للمال
وديره تجيها ابن فيها قصوري
والخامسة إياك ودروب الأنذال
النذل مثل الكلب نجس وعقوري
والسادسة يا أبوي لا تلطم الفال
وترجع تدور في حكاك ألقدوري
والسابعة لا تتبع القيل والقال
صادق صريح ولا تلف وتدوري
والثامنة صادق رياجيل عقال
وإياك تتبع ربع وأيل كفوري
والتاسعة لا تقرب الدين بطال
راعيه دايم لو يقـوم معثوري
والعاشرة ابغاك للطيب خيال
طيب كريم وشهم حي وغيوري
ولا تعتزي يا عبيد وتقول يا خال
اعتز بـ أخوك وغير أخوك معذوري
وختامها يا مشين الهرج لا طال
ويا الله بحسن الخاتمة يا غفوري

كتبتها لولدي عبدالرحمن وعمره 9 سنوات بعد ان اتصلت به اساله عن اخوه الاكبر وكيف يترك البيت بدون رجال فقال لي انا لست رجل في البيت ؟ انا يا ابويه رجال ولا تخاف وتفاعلت مع الرد وكتبت هذه القصيده واحتاج لراي الجميع بكل صراحه قبل ان اطلعه عليها واضمها الى ديواني سلك الذهب الحمياني / العتيبي

...
يازين هالكلام اللي طالع من القلب
قصيده فيهاا من الفوائد الشي الكثير
الله يطرح فيهم البركه ويخليك لهم..
تحياتي

الحمياني

جميله

فيها صدق المشاعر
ويكفي تعليق استاذي الكبير مرزوق العتيبي

لاتعليق لدي بعد ذالك

تحياتي

صح لسانك يالحمياني


نصيحه رائعه في قصيده قمه في الروعه


الله ينفعك بولدك

ذيبان

شكراً لمن تفاعل معي واعتز برأيكم جميعاً وتقبل الله منكم واسعدكم باولادكم وكل عزيز لديكم ولا زلت اطلب المشاركه بالراي من البقيه واخص بالذكر شاعرنا العظيم وصل العطياني وبدون مجامله

صح لسانك يالحمياني

والله يصلح النيه والذريه


لاهنت ولاهان غاليك

تقبل تحيات سعد العتيبي

ابن مرجاح