قصيدة الشاعر سلطان العرط في حفل الشيخ أبن وهق

قصيدة الشاعر/سلطان بن فيحان العرط في حفل الشيخ/ناصر بن وهق لشيوخ القبايل

أرجو أم تنال إعجابكم:



يامرحبا مليون والفين ترحيب=بسم الإمير نقولها بالنيابه
أنابني ناصر حصان الأطاليب=وأنا أتشرف لاومرني جنابه
يقول لي رحب وزيد التراحيب=وأقوله من جالكم مرحبابه
يامرحبا ماتطلع الشمس وتغيب=واعداد مابان القمر من غيابه
واعداد مافي نجد تذري الهباهيب=واعداد ماخط القلم بالكتابه
يامرحبا بالضيف عند المعازيب=بضيافة الوهقان سمو عتابه
في حلتن يطرب لها البال ويطيب=بأرض الخضاره جعلها لسحابه
دار الشيوخ مكملين المواجيب=اللي لهم قدر ومكان ومهابه
زحول الرجال اللي تهد الأصاعيب=أفعالهم مع غيرهم ماتشابه
أهل الكرم واهل الرماح المعاطيب=اللي مضاربها يضيع الدوا به
أبن وهق يوم السنين الشلاهيب=مقدام مرشد في زمان الحرابه
شداد الزعامه وآكب الزير وكليب=تاريخهم في نجد كلن درابه
قبل الشيوخ التاليه والمناصيب=والسيف قوة ضربته من نصابه
ناصر سلايل متعبين المناجيب=سادات من سادات في روس لابه
ناصر وأبوه دحيم ستر الرعابيب=عوق الخصيم اللي يحب الطلابه
ينهي مطاليبن وياخذ مطاليب=يضرب على الكايد بعزم وصلابه
للبيت ساس وللأماره معازيب=وشهو عمود البيت لولا طنابه
ربعي بني مرشد كعام الأجانيب=ليا ثارة الهيجا وغيم ضبابه
من روس روق معلقين الأصاويب=ركنن من الهيلا ويحسب حسابه
في مدح ربعي لانقاده ولاعيب=والناس محدن ضاع حقه نهابه
كلن رقا بالمجد روس المراقيب=وكلن على جسمه يفصل ثيابه
نعم القبايل دون شك ولا ريب=مايظلم الأجواد كود الزلابه
جنوب مع شمال شرقن وتغريب=كلن على ماقيل يشعب ركابه
والطيب سلمن وارثينه هل الطيب=والطيب لهل الطيب مابه غرابه
والطيب دربن عسر بالحيل وتعيب=ظلعن طويل ومن يهومه رقابه
عيال الحمايل ماعليهم مغاليب=كلن بطيبه باعبه واشترابه
يوم السنين عجاف غبرن مجاديب=عصر المشاكل والفتن والمجابه
قدام أخونوره يحل النواشيب=وينهي مجال الشر ويصك بابه
عبدالعزيز اللي دقم شوكة الذيب=من هيبته كل الدواهي تهابه
أحيا العقيده وأدب الخصم تأديب=وأقام شرع الله وطبق كتابه
أرسى قواعدها عطيب المضاريب=وأحيابها هدي النبي والصحابه
خلا قبايل نجد يمشون أصاحيب=عقب العداوه صار وصل وقرابه
صفت لبو تركي وصفا المشاريب=حكمه عدل بين الجميع ورضابه
وساروا على نهجه ملوكن نواجيب=الكل منهم طوره واعتنابه
واليوم أبو متعب رفيع الأساليب=عبدالله اللي كل خيرن سعابه
تم الجواب وكل معنى بترتيب=من شاعرن يفهم سلوبه وادابه
هذا الصحيح ولايجيبه شواذيب=قولن ليا قلناه نحمي عقابه
وصلوا على اللي ماوطت رجله العيب=نبينا اللي دعوته مستجابه
سلطان بن فيحان العرط المرشدي

صح لسان المرشدي ..


ولاهنت يالغالي
..

صح لسانك يابن العم واشكر سلطان بن نايف على التنزيل ويستاهل الشيخ ناصر بن وهق