الجفا والشوق

النوم للعين جافي والدهر جافي=والنفس اشوف الفرح عيا يوالفها
القلب بين الضلوع العوج ياكافي=تقول سرب(ن) من الميراج يقصفها
من يوم هب الهوا وسرف بي اسرافي=مراوح الشوق من يقدر يوقفها
غير انت ياصاحبي يازين الاوصافي=يابو جدايل على المتنين تنسفها
ياعين حرن تعلا فوق مشرافي=وادلا على صيدة(ن) فالقاع شايفها
وياعود موز(ن) على الانهارغريافي=وياعنق ريم(ن) مذيرها ملاقفها
دلك وزينك على الخفرات نوافي=وصايف الحسن طاغية(ن) وصايفها
مقبول منك التغلي والتعجرافي=مشاعر(ن) صادقه ماني مزيفها
شربت كاس الغلا من ودك الصافي=وروايع الصدر لجت لك غطارفها
انا مريض المحبه والله الشافي=الحق على الروح يالمملوح واسعفها
اكذب ليا قلت لك طيَب ومتعافي=وهواك فكري وخفاقي يلاوفها
واكذب ليا قلت لك ماعندي خلافي=وبنات الايام تعصف بي عواصفها
وش لون تقسى علي وتنكر الوافي=تنسى الاحاسيس وتعطل وظايفها
وش لون ماتترك الولهان يستافي=وانته لحون الطرب عندك معازفها
جفاك بعد المحبه شري الخافي=عذبتني بالحروف اللي تحرفها
اقول شي(ن) هذا تاليه ينعافي=لكن ربي بتصريفه يصرفها
ماني بقانط ولو ان الدهر جافي=عسى الفرح نفسي الحرفه يوالفها

الله اكبر يا عايض صح لسااااااااااانك ابدعت

صح لسانك يالتوم

اعجبتني القصيده كثيرا وقراتها اكثر من مره لروعتها

تحياتي وتقديري لك

الأخوه بن صنهوت
عايض العصيمي اشكركم على الاطراء
تحياتي لكم

صح لسانك يالتوم

مبدع لا تحرمنا جديدك

ودي واحترامي