ردة الشاعرة ريوف الشمري على قصيدة المريخي

يقول الشاعر (خالد المريخي) في إحدى قصائده ....





صادفني ثـلاث احتـرت وياهـن =أبهرني صحيح وقمـت أطالعهـن







طولهن واحد ولبستهن وممشاهـن =والله أعلم بعـد حتـى طبايعهـن


زاهيـات براقعهـن وتزهـاهـن =لعنبو جدهن مـا أحـلا براقعهـن


قمت أعدد على نفسـي مزاياهـن =و قمت أردد على نفسي وأنا اتبعهن


واستدارن بجنبي شخص ناداهـن =قلت ذي فرصتي باقصد واسمعهن


للقصايد مع اني حافـظ أرداهـن =ارتبكت وعجزت اتذكر أروعهـن


والسوالف بعـد خلنـي أنساهـن =ضيعنـي صحيـح الله يضيعهـن


والدليل إنـي تخربطـت وياهـن =ابسلـم عليهـن قمـت أودعهـن





---------------------------------------------------------------------------------

و هذا رد الشاعرة ريوف الشمري







مِزْن شعري هَطَلْ فوق الورق مَاهِـن =وين مـا وجَّهَـنْ زانـتْ مناقِعْهِـن

دام ربّـي بحـرف الحـقّ علّاهِـن =ما نْخَلق مِسْكِت مْزونـي وِ مانِعْهِـن

يمِّ (خالد) هبـوب الخيـر ودّاهِـن =وَهْدِيَ الخيـر قاريهِـن وِ سامعْهِـن

يالمريخـي حُروفـي هـاك معْناهِـن =خُوَّة الدين يابْـن النـاس دافِعْهِـن

آهِ يا بْيوت شعرٍ كـل مـا اقْراهِـن =في صِميم الحشا تنْبِـض مواجِعْهِـن

صادِفنَّك (ثلاث احْتـرتْ ويَّاهِـن) =شيِّ وارِد مـادام (ابْليـس) رابِعْهِـن

(زاهيـاتٍ براقعهـن وتزهـاهـن) =يا عنا قلب (خالـد) مِـن براقِعْهِـن

قِمْتِ تَرْوي على نفْسِـك مزاياهِـن =مِطْلِقٍ سَهْمِ عينـك فـي مراتِعْهِـن

طُولِهنْ ... لِبْسِهِنْ .. حتى وِ مَمْشاهِن =ما بِقى إلا عليـك اتْقِـزّ اصابِعْهِـن

وَ آعذابِك دِبَكْ بالقلـب ماطاهِـن =بَعْثَرنْ بِك حروفٍ كِنـتْ جامِعْهِـن

غرِّقَنَّـك وَ لا دلّيـتْ مرسـاهِـن =قَدّ الأمواج يومِ اْنِّك تِصارِعْهِـن؟!!!!

لو صَرفْـت النِظـر حتـى تَعدّاهِـن =كان الاضلاع بك ما فَـزّ هاجِعْهِـن

عَلِّم عْيونك اللي (برْقِـع) أنْساهِـن =حُكْم (غضّ البصر) واحْذر تِطاوِعْهِن

.

.

ثُم جِبْـت المِطِِمَّـه تِقْـلِ تجْزاهِـن =قُمْتِ (تَلْعَن) وِ ليت اللعْن رادِعْهِـن

لا دَخلْ بالقِصايد (لَعْـن) وَطَّاهِـن =يَنْفِث السُـمِّ فـي صافـي منابِعْهِـن

حَرِّمه مِن عَطا القيفـان و اهْداهِـن =كِـل شاعـر تَغنَّـا فـي مراتِعْهِـن

رَبِّ جمَّـل سِماواتَـهْ وِ سـوّاهِـن =سبعـةٍ دونِمـا عمـدان رافِعْهِـن

وِشْ لك (بجدهن) لَوْ حَـيِّ رَبَّاهِـن =يَسْتِرِنْ عِن هوى الناظـر براقِعْهِـن

وْ كان (بالسّوط) خوّفْهِن وِ ورِّاهِـن =وِ انْ عَصَنْ عَشَّاْ سوطه مِن مِذارِعْهِن

.

.

أما قولك (بجنبي شَخـص ناداهـن) =(قلت ذي فرصتي بقصد واسمعهِـن)

كِل مِن (ضَبْعِهِن) بالسـوق خلّاهِـن =مـا تَعَجَّـب إذا (غيـره) يتابِعْهِـن

و اللي قَدَّر حيا الخفْرات و اغْلاهِـن =مـا يِطـارِد حريـمٍ فـي براقِعْهِـن

.

.

للبِنِي قُمْ يا خالد طِيـب وانْصاهِـن =خِذ كلامي وصُبَّـه فـي مسامعْهِـن

مِظْهِرات العيون لْكل مـن جاهِـن =شاري الطيـب و الزّينـات بايعْهِـن

البراقـع مفاتـن و البِنِـي مَـاهِـن =نـازِلَات الفِتـن و الديـن رافعْهِـن

ينْزِلِنْ مِن مِشـى الميـلات ماطاهِـن =يَعْرِضِـنْ للمـلا فاسِـد بضايعْهِـن

البِنِي يزْهَـن الحِشمـه وِ تزْهاهِـن =مَنْبَع الطيب ينْهـل مـن منابِعْهِـن

أشْهد انْ مِنْ سِمَا (بالدين) مرْباهِـن =ما تِجِيـب الرِجـال الا مِزارِعْهِـن

حِيِّهِنْ ... حَيِّهِنْ .. والشعْر حيّاهِـن =واتْرِك اللـي بَلَنِّـكْ فـي براقِعْهِـن

وْ قِلْ بَعد للشِبـاب اللـي تِمنّاهِـن =البراقـع مدافِـع يـا مِطالِعْـهِـن

لا تِوقِّـف كِـذا قِـدام مَرْماهِـن =اِنْحش اِنْحش و انا اخْتِك عَن مدافعْهِن

سلمت على نقل هذه القصيدة والرد عليها , والله لايهينك يابوضيف الله



تحياتي

بيض الله وجهك


لاهنت


تحياااااااااااااااااااااااااااااتي