بيني وبين ملاعب القاف مقياس - وابلغت في قافي وحرفه انصابي / للضروره احكام .......

السلام عليكم ورحمة الله وبركاته ..
اهدي لكم هذه القصيده آمل ان تحوز رضاكم
وان تلامس احاسيسكم ..........



هاض القصيد وهيْضه قول خناس = وانا مع القيفان فكري سرابي
بيني وبين ملاعب القاف مقياس = وابلغت في قافي وحرفه نصابي
واليا حكمته مايجي فيه الافلاس=لاوالذي ينشي حقوق السحابي
ميثاق والميثاق مبني على ساس=ومعاهده يبقى بعمر الشبابي
مايشيب دام اني معه قاوي الباس=واليا نخيته فزلي واعتنابي
وان وصلت لحلقي خذا دور عباس=بنحور موذيني كبار العلابي
يامشتكي مني وانا منك منحاس = ليتك تميْز وش خطاك وصوابي
خذيتني بالصوت ياطابخ الفاس=واشرب مرق فاسك ومجْ اللعابي
واليا اعتلا صوتك ترى مالك اوناس=مالك شبيه الا نبيح الكلابي
واليا انتبهت اضربها اخماس بااسداس=وانشد عسى عنها يجيك المنابي
فاانه غشى عينك على عرفها انعاس=مااحد (ن) بناشد عنك دام انت هابي
ماني غشيم ولي مع الناس مرواس=ولكل علم مزهب (ن) لي زهابي
ماهو كلام(ن) ينكتب فوق قرطاس=واللي يرده واحد(ن) منه خابي
علم (ن) وكاد ووكده تجربت ناس = لهم مع العهد القديم اكترابي
سلم العرب يوم العرب معجم الناس=مرجع لنا يوم الزمان انقلابي
ورث (ن) حموه ووارثه كل فرّاس = من عهد كعب ابن زهير الصحابي
على النقا واهل النقا در ْ والماس=وامجودين الورث صِلبْ ومرابي
يوم الزمان اللي به تضيق الانفاس = حطو لهم في ماقف(ن) مايعابي
موضع قدم مع لابس الجوخ والطاس=والسالفه ماهي خراص وتغابي
الله واكبر كل ماهب نسناس=على السيوف اللي تقص الرقابي
لنصرة نبي الله وتطهير الادناس= وقفة شرف ماهي نفاق وسبابي
ماهي حروف (ن) تنسفط بين الاقواس= ولاهي علوم اللي يجور ويحابي
والا المثل قالوه قبلي هل الباس=وشهوده اهل العرف بااول خطابي
عش الحديْه ماطلع منه قرناس = والذيخ ماخلـْف قطيع الذيابي
والناس فيها من عديمين الاجناس=وفيها من الغث الوضيع اقترابي
وانا عرفت الساس والساس محتاس=اسود سواده مثل لون الغرابي
الوجه بيْن واللعانه من الساس = خبيث يامال الفنا والذهابي
الله يقطع نسل ميراد الانجاس = ياعلهم بين الثرى والترابي
الطيب ندريبه من الراس للراس = كبْ السوالف عنك واسمع جوابي
ذولا بقايا قوم هافي وبلاس = في مامضى يمشون درب الخرابي
والا انت ماهرجك يجي فيه نوماس = ولا وقف شرواك في راس نابي
بين الدحول العمر تقضيه عساس = تعيش عمرك متـْبع للسرابي
وخاب الذي للحنضله بات غراس=لو ظل يسقيها قراح الشرابي
مايجني الا مرْها شرب بالكاس = تاضح لو انه قال مااحد ( ن) درابي
واللي يعاند كلمة الحق ينداس = لابد يطحن بين ضرس (ن) ونابي
واللي غدت له كلمة الحق نبراس = ماهو بضارب للملامه حسابي
ولاني على غلطات الاجواد حرْاس = سواة من في كل علم (ن) يبابي
لاشاف له زله تقل ضاربه ماس = واللوم فاتح له ثلاثين بابي
ماصكته بقعا ولامره الياس = ولاذاق من ميل الدهر سم دابي
واشيب عينه يوم الارياق يبْاس = والا هنا قلبه ليالي عذابي
ماللشدايد كود قطْاع الارماس=والا الرخا كل (ن) يسوق الركابي


وسلامتكم ...
اتمنى ان ترضي مشاعركم ..
تحياتي وتقديري .. بدرالهبيري ..

الله الله

صح لسانكـ

وبيض اللـه وجهكـ

بدر الهبيري

لله دررك

ابدااع .. شلون ماترضي مشاعرنا وانت جمعت فيها

هذا الكم من المعاني ..سلمت يداك ..وسلم فكرك

صح لسانك

احتراماتي:)

جزالة ابياتك يالحربي

جمعت درر المعاني

وقوة اللفظ

صح لسانك مدد بلا عدد

لك كامل المعزه والتقدير

فيصل النفيعي

الاخ ابو بجاد الرويس :/ صح بدنك
وماقصرت على ردك الجميل وعلى
ردودك السابقه شاكر اهتمامك ..
تحياتي وتقديري .. بدرالهبيري ..

الاخ مخلف الهقاوي .. ونعم بك طال عمرك
وصح بدنك ياالغالي وصراحه شهادتك افتخر
بها واعتز بها مثل مااعتز بحضورك وردك طال
عمرك لاهنت على الرد الجميل الرائع ..
تحياتي وتقديري .. بدرعيد ..

الاخ العزيز فيصل النفيعي حياك الله
وصح بدنك يالغالي وشهادتك اعتبرها
فخر لي واتشرف بها وكذلك اتشرف
بوجودي بين اخواني من قبيلة عتيبه
لاهنت على ردك الذي اتنومس به بكل
قصيده ...
تحياتي وتقديري .. بدرعيد ..

للرفع والاطلاع

..
.
لافض فوك يابدر فقد ابدعت ..
. سجل اعجابي بشعرك .... وشوقي لجديدك ...
....

بيض الله وجهك
صح لسانك وعلا شأنك
قصسدة جزلة
عساااااااااااااااااااااك سالم

تحيـــــــــــــــــــــــــــــــــــــاتي,,,,

الاخ مرزوق العتيبي حياك الله وتشرفت
بحضورك يالغالي صح بدنك ومتابعتك لي
اعتبرها شرف كبير يالقرم ..
تحياتي وتقديري .. بدرعيد ..

الاخ الكريم النجم صح بدنك يالغالي
وردك طال عمرك هو الجزل لاهنت ..
تحياتي وتقديري .. بدرالهبيري ..