يا حسين قبل الفنا خذ مني الجزله =ذي خارطة كنز ابوك بداخل ابياته

يا حسين قبل الفنا خذ مني الجزله =ذي خارطة كنز ابوك بداخل ابياته
ورث الذهب ما يفيد اللحية الرزله =والفقر ما عيّب اللي يحترم ذاته
ولا كل رغبات راعي المال تنجزله =كم رغبةٍ بيدت حيله وحيلاته
انصحك عن طلعة تفجعك بالنزله =الكذب ما يحمد العاقل نهاياته
لا من تكلمت كب الهرجة الهزله =واذكر من الهرج دسماته وجزلاته
ومن بان في ثوب غيره حط في عزله =ويفضح قصير النظر كثر اتجاهاته
وياحسين لاجاز لك عقل الرجل جزله =وره حقيقة شعورك واطلع مرآته
وابعد عن الصاحب المشبوه واعتزله =تراك لو ماتتيه تشيل تيهاته
والنذل لو مت جايع لا تلزلزله =ارفع مقامك عن الواطي ومنّاته
ولا كل صاحب رخا بالضيق يعنزله =ياكثر ما تكتشف لا احتجت علاّته
وراعي الحسد ما يخلي للحيّل غزله =لا يستثيرك بهمزاته ولمزاته
ترى سكوت الرجل لا زعّل اركز له =راع الحجا يذبح الحساد بسكاته






مهما يكون الشعور اللي علي بادي =لا زلت انا الوارد اللي ماطوى حبله
على القراح الزلالي طال تردادي =اشرب واصدر ظما مدري وش اشرب له
يا من تغاربتي غيابي وهو عادي =بُعد الرجل عن دواعي ذله اهيب له
ماامشي قبل لا اعرف الوجهه بلا قادي =ولا اصلي الا وانا متقبل القبله
منزالي النايفه عن حدري الوادي =ورجلٍ يجي في مسيل السيل يا هبله
أبعدت مالي غرض في ذل مقعادي =ما دام يلعب لي الذعذاع والعب له
ماني لعرفي مع هل العرف مترادي =لاشك كبدي من اللي شفت مندبله
يا لاقية خير هاك العلم للغادي =اللي عجز يفرق الشيحه من الربله
أمانتك بلغيه لكل حسادي =لا غارت الكدش وكحيلان باصطبله
أنا أول العشر ماني للعشر حادي =مالك ومال افتراض الجاهل الأبله
يموت انا حاسدي ما ياصل ابعادي =منّي نجوم السما لو يفهم اقرب له
ولابد ما الهايج المايج يجي هادي =وكلٍ يشاف المكان اللي يناسب له
إن مت مات النبي وآباي واجدادي =وما دام لي يومٍ ماني ميّتٍ قبله















يا خاطري مهما زعلت ابعد الرمس =خل الزعل عن مزعلك سر مكتوم
لا تلمس الجرح الخفي داخلي لمس =تراك في هالسالفه منت ملزوم
ماليوم لو تستنكر الوضع مثل أمس =يا كبر فرق صار بين أمس واليوم
بيني وبينك خلها همس في همس =ترى اصدقانا بالحقيقه هم القوم
عندي خبر بأهل الحسد رايهم عمس =اول هدفهم وأخره صار مفهوم
والله لو أظهر للملا كني الشمس =غير يتظاهر حاسدي بالعما دوم
النمس يبقى طول عمره وهو نمس =والبوم يحسب كل طاير سما بوم
وكم جاهل يهرف ولا يعرف الطمس =له عند حسادي سواليف وعلوم
ياخاطري مايصفق الخمس بالخمس =غير اللذي صارو له امثالك خصوم
اصبح على رجوى فرج خالقك وأمّس =مالك بغير الله فرج ضيق وهموم











الشاعرالقدير عبدالرزاق الهذيل

صح السان شاعرها ولاهنت يارشيد