الربيـــــع

يا زين شوف الحيا بأطراف ساموده=و خوة نشاما مع الطرقة يسلوني
الكل منهم عريب الخال وجدوده=ماهم من اللي من الخوة يملوني
الكل منهم بذل جهده ومجهوده=خفاف الأنفس رجال بالسفر عوني
علومهم طيبة بالخير مشهوده=لطيب القول والأشعار يرووني
في تالي الليل تلقى النار موقوده=والبرد ما ردهم لازم يصلوني
ما حد يحب المنام وكثرة رقوده=من لحفهم والذرى عجل يفزوني
سووا من البن للشراب مقصوده=فنجال عن هرجة النقاد مضموني
أغراضنا في عزبنا دوم موجوده=من الغمارة اليا الصندوق مشحوني
يا زين شوف الخزامى تلعب وروده=يفوح عطره مع النسمات بالهوني
معه النفل واضح لونه كمل عوده=مع كل عشبٍ فرق بالشكل واللوني
غطى نباته دماث الأرض و صموده=سجادة صاغها من كون الكوني
يا زين صوت الموّده لا نهم ذوده=معه أم سالم تجر الصوت بلحوني
الرزق مكتوب و اللآجال محدوده=بسج في البر مع ناس يسجوني
خص ليا صّدق البراق ورعوده=أحس نفسي مع أهل المدن مسجوني
هذا هوا النفس و الشطّات مفقوده=قلبي مع البر وأهله دوم مفتوني
وقت سعيد مضى بأيام معدوده=يجلا عن النفس همٍ كان مدفوني



الشاعر/ فواد بن سعد بن خرصان الحافي العتيبي