الفالح اقرب جاي

الفالح مسيت بالخير ودنا بطاروق معك وعلى راحتك متى ماسمح وقتك
استلم



يالفالح اللي تغني بالمثايل والطروقي =تعال واخذ الكلام اللي يجمّل من يقوله

عامين مدري ثلاثه وانت من سوقٍ لسوقي=مدري كسبت الوصافه ياولد ولا البطوله

الله يمسيك بالخير ولي الشرف اني اجاريك

واستلم


حيّا الله الشاعر اللي جاب له قافٍ يشوقي=والناس تحكم على الرجّال من فعله وقوله
انا اكسب الاوله من عادتي وانا ابن روقي=والاوله ما يحصّلها البنادم بالسهوله

ابقا الله اللي على درب السنع دايم سبوقي=والناس لاجبت سيرة شخص قالوالك فعوله

الاوله روّحت ياصاحبي ليتك تفوقي=سرى بها اللي ترك له بصمةٍ في كل جوله

عيني تخيل الخيال اللي ترفّ به البروقي=والظاهر انه ما غير بروق ما تدرج سيوله
قال المثل ما يكذّب علم رجّالٍ صدوقي=لا قلت لك علم ضمّه لا تردد في قبوله

خلك على الهون قبل يفور دمك فالعروقي=وسهيل ودك تنوشه بس ماتقدر تطوله

قلت الك علمٍ مّوثق ياعميلي بالوثوقي=وصلك علمي ونفسك لاتجي دايم عجوله

..
.
المحامي .. والفالح ...
وصفحه مليئه بالابداع ....
على القوه .. ياشعار .... وصف الفالح ....
مكتمل ...

ارحب يامرزوق العتيبي
حضورك مكسب وخل الفالح ينفعك ههههههههههههههههه
مادام انك بصفه

عز الله اني على خوّة هل الطاله شفوقي=وسهيل حول الجدي والجدي طول الوقت حوله
بين الثرى والثريا كم تعدّ من الفروقي=بحر الوفا والمراجل سابحه عرضه وطوله

عز الله انك معي بالحيل يالفالح خلوقي=لولا الحيا كان وريتك زمانك مع ميوله
شمسك قريّب من المغرب بعيد عن الشروقي=والوقت لومال ماتقدر تكيّف مع فصوله

عز الله اني على خوّة هل الطاله شفوقي=وسهيل حول الجدي والجدي طول الوقت حوله
بين الثرى والثريا كم تعدّ من الفروقي=بحر الوفا والمراجل سابحه عرضه وطوله هنا الجزاله هنا الابداع المحامي والفالح صحت السنتكم شعار مبدعين

كم واحدٍ يحسن المنطوق والقلب محروقي=والكبد من حر ما يونس من الهمّ معلوله
مدام ما انته محصّل لا صبوح ولا غبوقي=وش موزم اللي على درب الشقاء يشعب ذلوله

صح لسانك يالفالح كفيت ووفيت وبيض الله وجهك يالغالي

النشمي مرحبا ومسهلا بك