الآهـــات والنـــوح

يا هيه مالي على الهجران مصلوحـي = يا روح قلبي ويـا عمري و وجدانـي

الفكر مشغول والاحساس مجروحـي = وقلبي على وصالكم لا شـك ولهانـي

بيني وبينك خـفايا الصمت والبوحي = يا كيف انا انساك يا كيف انت تنساني

والله ما دونك الا ضـيـم وجروحي = و والله ما عـقبـك الا دمـع الاعياني

عانيـت في بعدك الآهات والنوحي = وسامـرت من بعدك همومي واحـزاني

ارجـع عـليّه ورد الـروح يا روحي = واجبـر بخاطر محبـك والعمر فانـي

تـعال حاك الضلوع الصم لك توحي = تـعال شوف المفارق حطم اركاني

شوق و وله وانتظار ودم مسفـوحي = من طعن خنجرك لي مدة وانا اعاني

مسموح ياللي طعنت القلب مسموحي = مير الغياب اقصره وارجع على شاني

واللي نشدني عن الآهات والنوحـي = قلت له هذي ضريبة طعنة الجـاني

غروٍ جـميلٍ مكـحّل حيل ممـلوحي = به عنـفـوان الطفولة دوم متفاني

مـن عـقبه اجر موالي وانا انوحي = يا روح قلـبي ويا عـمري و وجداني


وسلامة نواظركم

الله الله الله الله

صح لسانك يالطويل وبيض الله وجهك على القصيده الطيبه ..

لاهنت... ونتمنى المزيد من القصايد ...شاكر تواجدك معنا والى الامام..

الاخ هايل العتيبي

صح بدنك ووجهك ابيض يا طويل العمر

شاكر لك المرور الجميل

الطويل صح لسااااااانك لاهنت
قصيده شامخه مثل شاعرها
تقبل تحياتي