نصيحه

الا يالله يامنجي نبيه من لهيب النار = تنجيني من ذنوب ٍ عليه ما لها تالي
طلبتك ياكريم الوجه يا معبود ياغفار = ولا غيرك نبي نطلب ولا غيرك لنا والي
والا ياقيل من جرب لذيذ الوقت والامرار = تعلم في زمانه لين ذاق المر والحالي
بعدها يافهد هذي نصايح وافيه واقصار = تبي تغنيك عن بعض الحكي لو يافهد طالي
انا اباوصيك في تقوى العزيز الواحد الجبار = رضا ربك يفرج كل هم وكل غربالي
وبر بوالدينك واعرف انك في فلك دوار = سلف مدفوع مخلاصه عليك ريال بريالي
ثلاثه لا تهاون في غلاهم لو عليك إعسار = خوي الجنب وضيوفك وجارك قدّم الغالي
سلوم جدودنا من ماضي الهجره هدف واشعار = نضحي لاجلها يا عزوتي بالحال والمالي
وانا شفت الرجال اشكال مثل الخيل فالمضمار = ليا طول عليها الماد بان الدون والعالي
يبين الك الاصيل اللي تسلسل من ظهور احرار = يشوقك ما تغض العين عنه اقفاي واقبالي
ويظهر لك كديش اصله ردي تكرم تراه حمار = ولو انه صهل يقناه تال الوقت حمالي
تخير من رجال ٍ طيبه بالفعل والاذكار = تسرك صحبة الطيب ليا من الدهر مالي
حذاري لا تغرك ضحكة البواق والثرثار = تبي تصبح تبيع من الهقاوي في خلا خالي
وخلك ظل لاقرابك تواضع واطرح الانظار = عسى ينهار قصر ٍ ما يجي له ستر وظلالي
عضيدك درع جنبك ما يخيّب سيفك البتار = (يزيد) اليا تخيته بان اله وقفات وافعالي
وتحرص من قريب ٍ كنه الزاروق سمّه حار = طري بملمسه لكن فيه المكر محتالي
كثير هياط لاينفع ولا يشفع وفيه انكار = مثل فار الخرابه للردي والخبث مرسالي
واخير القول مني للنبي شفيعنا المختار = عليه افضل صلاه المصطفى ماهل همالي

صح لسانكــ

ومشكوور على النقل الرآئع

صح لسانك ويعطبك العاااااااااافية