حمود السمي وسلطان الجلاوي انته مثل غسان والا مثل ابن عمك رشيد

السلام عليكم ورحمة الله وبركاته


طاروق بين الشاعرين

حمود السمي و سلطان الجلاوي

بـ حفل تخرخ أبناء قبيلة عتيبه من كلية الملك فهد البحريه


حمود السمي

سلام ياهل السلم واهل العلم والرأي السديد=عتيبه الهيلا تمثل ثلث شعب المملكه
وانا من اهل السيف واهل الرمح والمجد التليد=حنا البقوم اهل تربه ميقافنا مانتركه

سلطان الجلاوي

يامرحبا ترحيبةً تغنيك عن كل الرصيد=يالشاعر اللي لاحضرت الملعبه فيك بركه
ماقول فيك قصور من ربعً تفيد وتستفيد=لكن وش رأيك يأبن عايض تكب الفبركه

حمود السمي

فالملعبه والا بليا ملعبه خصمً عنيد=لا قلت بيتً فالرياض تعاواه المدركه
سلطان شيباني وانا ماجبت لي علمً جديد=لو يطرده شرطي بدوريه مايقدر يمسكه

سلطان الجلاوي

لاتحسبنك ياوسيع المعرفه عايش وحيد=لكن بيتك ياولد عايض يباله حكحكه
سلطان شيباني جبرك تحط في خضر الجليد=ثوبك وبشتك ياعميلي فالسنين المهلكه

حمود السمي

اعطيك بيت من القصيد يدمر بيوت القصيد=وليا بغا سبك اسبكه وليا بغا حبك احبكه
تقولها وانته تحاوز من بعيد اليا بعيد=ترتاع لو اوحيت لك ورعً يقرقع بتنكه

سلطان الجلاوي

فعلاً ترا بيتك يغث كبود عشاق النشيد=في بدايته مثل الكسور وفالنهايه لكلكه
انت تعرفني ياولد عايض حفيد ابن فهيد=لاتحسبنا ياولد عايض من اهل الشكشكه

حمود السمي

عندي وعندك خير ابن عمي بعد تركي حميد=والله ماتاخذ زايده في سلم والا معركه
انته مثل غسان والا مثل ابن عمك رشيد=الارض كم فيها جبل والبحر كم فيه سمكه

سلطان الجلاوي

ياحمود كب الكذب عنك الموت في حبل الوريد=لاتعشق الكذب الفضولي مثل عشق السكسكه




http://www.youtube.com/watch?v=_bXMG8JuIx4&feature=related


أخوكم : سيف السليس

سلطان شيباني جبرك تحط في خضر الجليد=ثوبك وبشتك ياعميلي فالسنين المهلكه


في الفترة الأخيرة هناك تطور ملحوظ في مستوى ابو صاهد وان شاء الله دوم ..
.
.
.
يعطيك العافية على اختيارك الرائع ياسيف

اكوووووووووووووي يابوصاهد


والله محاورة ممتعة وابداع من الشاعرين ولكن في الامور هذي مالها الا سلطان


حمود السمي



عندي وعندك خير ابن عمي بعد تركي حميد
والله ماتاخذ زايده فـي سلـم والا معركـه
!!!!!!!!!!!!!!!!!!!!!!!!!

بيت يدل على ضعف حجة وموقف حمود السمي ،، قام يطعن في الانساب ،، الظاهر اعدوه الربع اللي انا خابر

ورد من سلطان الجلاوي موفق،، رغم اني تمنيت يكون رده اقوى من هذا الرد
سلطان الجلاوي



ياحمود كب الكذب عنك الموت في حبل الوريد
لاتعشق الكذب الفضولي مثل عشق السكسكه






لاهنت ياسيف

طاروق قوي

ابدااااااع من الشاعرين


فتل ونقض من طراز فريد


السمي مزاجي أحيانا يأتي له طاروق يساوي الف طاروق وأحيانا تجده يمشي الطاروق بمستوى متوسط


ابو صاهد مبدع وفي هذا الطاروق كان في قمة حضوره

طاروق ناري وسهم عتيبه كان رادار في وجه السمي مع ملاحظه ان سلطان لا يهمه الاستفزاز

شكرا سيف السليس


طاروق ممتاز وقافية غير مستهلكه


تسلسل جيد في الأبيات


كلا الشاعرين في قمة حضورهما


دمت بود

ابدع سلطان الجلاوي والى الامام ولاهان السمي

لاهنت ياسنايدي ع النقل

طاروق أقل من عادي من الشاعرين بدايته كانت جميله وتهدف الى معنى ما ..



ولكن نهايته كانت تعيسه ..



حمود السمي أبيات بلا طعم ولا لون وضعف تجلى للجميع .. سلطان الجلاوي كان الافضل ولكن كعادته في الابيات السطحيه وحشو البيت فقد كرر ولد عايض اربع مرات في سبع ابيات !!



أشكرك أخي على النقل الجميل ..




تحياتي

مابعد ردك ياطلب الشيباني رد

فعلا محاورة سطحية وتمشيت حال

عتيبه الهيلا تمثـل ثلـث شعـب المملكـه

الظاهر التعب كله من شان ذا المعنى ياقوته من معنى وبعده غطا على معاني الاولين

تحياتي

عندي وعندك خير ابن عمي بعد تركي حميد ... والله مـاتـاخـذ زايـــده فــــي ســلــم والا مـعـركــه


وش ذا البيت .. انا اول مره اسمع ان ابن حميد بقمي .!؟


صدق ذا الكلام .. ولا مجرد لكاعه من السمي ..!؟

حمود السمي


سـلام ياهـل السلـم واهـل العلـم والـرأي السديـد
عتـيـبـه الـهـيـلا تـمـثـل ثـلــث شــعــب المـمـلـكـه !!

سلطان الجلاوي


يامرحبـا ترحيبـةً تغنـيـك عــن كــل الرصـيـد
يالشاعر اللي لاحضرت الملعبه فيك بركه

هل تعتقدون أن سلطان رد على بيت حمود ؟

حمود السمي



عندي وعندك خير ابن عمي بعد تركي حميد
والله مـاتـاخـذ زايـــده فــــي ســلــم والا مـعـركــه
انتـه مثـل غسـان والا مثـل ابـن عمـك رشـيـد !!
الارض كم فيها جبـل والبحـر كـم فيـه سمكـه



سلطان الجلاوي



ياحمود كب الكذب عنك الموت في حبل الوريد
لاتعشق الكذب الفضولي مثل عشق السكسكه !!؟



أخواني اللي يقولو سطحية أقولهم سطحية من جهة سلطان الجلاوي و لم يفهم على حمود و إلى ماذا يرمي!!
تقبلوا مروري..

الرائع : سيف السليس
بيض الله وجهك .. ولاهان رأسك ...


.......... أما بخصوص المحاوره :

... لاننكر بإن العجز كانت قافيته رائعه ..

أمابخصوص المستوى :

مع كامل أحترااامي وتقديري
للشاعر : سلطان الجلاوي :


.... كان البقمي ...

في هذه المحاوره ...

بالفعل متفووووووووق بكل المقاييس ..



أحترامي

يوسف العازمي ممكن توضح كيف الجلاوي ما فهم السمي !!

شكراً ياسيف على الطاروق الرائع

الجاهل عدو نفسه


بعض الردود مالها الا تضحك علاها وعلى راعيها

لاهنت على النقل ياسيف