محاوره بين ناصر الشيباني واحمد الشايع

هاذي المحاوره بين الشاعرين ناصر بن سرحان الشيباني والشاعر احمد الناصر الشايع
قال احمد الناصر:
ياسلام الله على من سمع صوتي سلام
....................................عد وبل المزنه اللي تلوح ابروقها
ردة في اللعب ماهي حلال ولاحرام
..................................حاليه في حال وبحال مر ذوقها
ناصر بن سرحان:
مرحبا بالصاحب اللي عرف وزن الكلام
..............................كامل بالعرف والناس دون حقوقها
من تعلم يابو ناصر عرف رد العلام
............................والبضائع كلها باعها في سوقها
احمد الناصر:
المعان الطيبه نورها يجلا الظلام
.........................والضعيفه تتعب الناس كثر افتوقها
كن لك من يوم فارقتنا عشرين عام
.........................طالت الغيبه واباانشدك ويش اوفوقها
ناصر بن سرحان:
انت راعي معرفه واللحم يكس العظام
......................وانظر اللي تحتها وانظر اللي فوقها
غيبتي عقبك جميله على عز ومقام
......................داله في ديرة طالع زملوقها
احمد الناصر:
نشدتني باللعب مالي بها قصد ومرام
....................عادة الشعار تمشي على طاروقها
يوم شفتك هل شهر الفطر عقب الصيام
...................تو كبدي يابن مشيب تلين اعروقها
ناصر بن سرحان:
حتى انا عقبك عيوني شقيه ماتنام
.................انت مابقت المعرفه وانا مابوقها
دام انا في ماقفي والفشق ملي الحزام
.................والمعرفه ينجح اللي يشد اسبوقها

تقبلوا تحياتي:
((الدلبحي))

بيض الله وجهك ياخوي ((الدلبحي)) , دائماً متميز الله يعطيك العافية , وانت احد فرسان منتدى قبيلة عتيبة , والشاعرين ناصر بن سرحان رحمة الله واحمد الناصر اطال الله عمرة من فطاحلة الشعراء , وشعرهم قيم ورائع.

والله يكثر من امثالك: ( يافتى الجمش ).


اخوك , وصديقك:
ابن مشيب........الشيباني العتيبي.

اخوي العزيز بن مشيب الله يعافيك ويسلمك دايم كلامك طيب وشعور طيب
يحمل في داخله عروق الصداقه اخوي بن مشيب انا شاكر لك على هذا الشعور
وآمل ان ماقدمه يحوز علة رضا جميع زوار المنتدى
والله يوفقنا لمافيه وتسلم يابن مشيب
اخوك وصديقك:
((الدلبحي))