دعم ربعه عتيبه فالمزاين دعم لامحدود ///بدعمٍ يوم قاله هوّل الشيخان واذهلها

سلامي عد ماينبت نبات وماتهب النود = وعدد مبدا النجوم وعد ماهلّت همايلها
وسلامي عد ماتبرق بروق وماتدن رعود = وعدد ماهلُت ثعول المخايل من مخايلها
وعدد من عظُم الخالق وصلى لله المعبود = وعدد ما فالجزيره من شعوب ومن قبايلها
على سعود المريبض مسندي راع الكرم والجود = أبكتب له بيوتٍ من صميم القلب وارسلها
أبا أرسل مدحي الصادق على وضح النقا المجرود = لشيخ ٍ والله أنه حقق الطاله وحصلها
كريمٍ جامعٍ كل المراجل دون نقص وزود = جهوده ساعة الشدات والوقفات يبذلها
على فعله عتيبه كلها تهديه مسك وعود = جماله من عتيبه للرجال اللي تجملها
دعم ربعه عتيبه فالمزاين دعم لامحدود = بدعمٍ يوم قاله هوّل الشيخان واذهلها
ومستشفى بوسط الملتقى حطه بدون قيود = هذا غير المضيف اللي مواجيبه مكملها
كرامه منه للي حافظوا على سهاف القود = مذاخير الجدود اللي عسى الجنه منازلها
مغاتيرٍ حلاياها قليله مع طرفها سود = يسرك شوفها لاجات لو ماانته من اهلها
سنامٍ منعجف وارقاب منتلّه سوات العود = نسانيسٍ طوال وجيه ضافيةٍ مهادلها
حموها في زمانٍ فات يوم الطرد والمطرود = رجالٍ تارد حياض المنايا دونها والها
حموها بالسيوف الحدب والارماح والبارود = ومشو في شفها مارددوها عن مداهلها
وعقب صار الحكم لله سبحانه ثم ابن سعود = جمع كل الشتات ووّحد الدوله من اولها
وصرنا كلبونا اخوان لاضاهد ولا مضهود = وحنا اليوم في نعمه عسى الله مايبدلها

الشاعر // محمد بن شاعي الغنامي