-‏ اصحاب الرخا والشدة.. لشاعر سعود بن بدر_ راع الكايدة

بسم الله الرحمن الرحيم
السلام عليكم ورحمة الله وبركاته
/

بديت باسم اللي له الناس يرجون = = = سبحان من مده لعبده سراديب

يفرج هموم اللي من الوقت مشحون = = = واليا طلبه العبد لبى المطاليب

واللي بعد برتب القاف بلحون = = = وارتب المعنى على الكيف ترتيب

واشرح تواصيف(ن) لها الناس يدرون = = = واوضح المعنى على الخبث والطيب

اصحابنا وقت الشدايد يقلون = = = وعند الرخا ياكثر عد الاصاحيب

تناقص الاصحاب من دون في دون = = = ياكثر من يجهل حقوق المواجيب

بعض الاوادم عشرته ضحكة سنون = = = يضحك معك والقصد ماداخل الجيب

ناس(ن) هدفهم منك واضح ويخفون = = = لجل الطمع والمال جولك محابيب

ون شدة الايام بالعسر يقفون = = = وبعد الصداقه عندهم تنقلب ذيب

كل(ن) غسل منك الصداقه بصابون = = = طيور موج البحر قطم المخاليب

ون شفت بعض الناس عني يصدون = = = ماتبع ورا المقفين تبعي لهم عيب

وراسي على الصكات تنبت له قرون = = = واشيل حملي لو ثقل بالمناكيب

واصارع الدنيا على الشين والنون = = = ويبين لي وقت الشدايد مشابيب

ناس(ن) اليا زاد القسى معه يقسون = = = وغيث(ن) اليا جفت علي المشاريب

يفرح بهم قلب(ن) من الهم مغبون = = = ويطلع بهم من جار حمله مراقيب

كلام ابو مشيب حقيقي ومضمون = = = عاصر ومارس في زمانه تجاريب

والتجربه لرجل برهان وعيون = = = ورجل(ن) بليا تجربه داخله ريب

يندان ثم يصبح من الحق مديون = = = واليا طلب حقه بدت له مطاليب

دنيا تقلب كل يوم(ن) لها لون = = = تقفي وتقبل بالقدر والمكاتيب

- الشاعر/ سعود بن بدر الشيباني،
راع الكايدة