البث المباشر

جات القوافي شرّدٍ بلسان شاعرها الفصيح=تحمل مضامين الخبر واخبار لندن ذاعته
فوراً على البث المباشر ينتشر مع كل ريح=مادام ذنب المبُتلا عُلق على شماعته
الليل عتّم والمساري بين شوك وبين شيح=عامين طايع للزمان ولاظفر من طاعته
وش حيلة اللي فالكتيبه يستعد ويستريح=حسب الأوامر يجتهد مير الليالي لاعته
الله يعينك تحتزم بالصبر يالقلب الجريح=مالك دوا عند الطبيب ولاتفيد اشاعته
من لايوقّت ساعته دايم على الوقت الصحيح=لايزعل اليا فاته الموعد ودقّت ساعته
واللي يقول ان العطا وافي من الكف الشحيح=ماكنه الا جم بيرٍ مالحقنا قاعته
الذيب يوم إنه عوى ماهو على شان الفحيح=والحيه اللي تطّحن ماهي سبب في راعته
من طلقةٍ رمايها ضيّق به الكون الفسيح=والرجم يحمي من زبن والذيب صان وداعته
له فرّةٍ مع كرّةٍ بين السلامه والمطيح=دامه على المرقاب عدى والسمين اطماعته
ماغز نابه فالسقيمه والكسيره والنطيح=خلا الضعيفه للضعيف وسببت في ضاعته
مردودها في ساعةٍ دقّت على الوقت الصحيح=واللي يهمه موعده لازم يوقّت ساعته








عبدالله محمد العصيمي

الله الله ..
صح لسسـإن العصـيـميُ ..
ولاهنت يـ: ضـامـي !

بارك الله بك , شكراً أخي الكريم

صح لسانه ولا هنت ياطيب

بارك الله بك , شكراً أخي الكريم