لاتطرد المقفي ولا تشاور العي ،،،

لاتطرد المقفي وﻻ‌ تشاور العي
قدام ياكلك الندم والحسوفه

ترى حكيم الشور ياخذ ويعطي
نفسه من الراي الدناوي عيوفه

وﻻ‌ تقرب الشبهه وﻻ‌ تخاوي السي
عليك باللي طيبات وصوفه

من رافق الطيب شرب صافي المي
ومن رافق الهافي جفا الماء كفوفه

وﻻ‌ تنكر المعروف لو أنه شوي
من قدم المعروف رد معروفه

وأدمح خطا الطيب ليا صار مخطي
وأقبل معاذيره وقدر ظروفه

وﻻ‌ تنهر المحتاج ﻻ‌ جاك مبلي
خسارة في فعل خير مخلوفه

وأطلق حجاجك ﻻ‌قبل الخاطر وحي
بشاشة الطيب كرامة ضيوفه

ترى الكريم معان بالخير مرهي
من يترك الماجوب جعله ذلوفه

لاتقطع الرفقه ولو حبلها لي
حبل الرفق من يفلته بان خوفه

رجل بﻼ‌ ربعه من الناس مجفي
ﻻ‌ بد صكات الليالي تحوفه

واللي بعينه ما يشوف البشر شي
ترى البشر بعيونها ما تشوفه

ومن عوده حظه على بارد الفي
ﻻ‌ بد لفحات السمايم تلوفه

ومن ساقته نفسه على سكة الغي
صعب عليه ليا تمادى نكوفه

ترى الليالي تطوي أيامنا طي
يالله بحسن الخاتمه والمروفه

اخي مطلق السلام عليكم...

الرجاء ذكر اسم صاحب القصيدة الشاعر سعد بن جدلان، كأقل ما يمكن أن يفعل لصاحب أي إبداع. وتقبل تحياتي