الشيخ حسن بن علي ابو ظهر الثبيتي يرثي والدته ... مؤثره جدااا

كتب معالي الشيخ حسن بن علي ابو ظهر الثبيتي قصيدة تكتب بماء الذهب
رثاءا في والدته نسأل الله لها المغفره والرحمة ....

استأذنته في نقلها لكم وكتبتها هنا يقول فيها :


اليومه الجمعه طفت شمعة البيت = حتى ركون البيت صارت ظلاما
واخذ البكى مني نصيبه وهليت = هليت دمع مثل وبل الغماما
واخفيت لين ازريت وابديت ماخفيت = واللي سواتي فالزمن مايلاما
قلبي حزين مشتت الفكر تشتيت = راضي بحكم الله رب الاناما
حبيتها حب عليه استمريت =طيلة حياتي كل يوم يتناما
حتى بعد دفنتها ثم قفيت = مازال في قلبي يرز الخياما
الموت له حزه وموعد وتوقيت = الموت حق ولاش منه نهزاما
ماكني ابها في حياتي تهنيت = ولا وقفت الها قدر واحتراما
ولا كني بعطف الامومه تدفيت = على مدى واحد وخمسين عاما
ولا كن معها في حياتي تسليت = ولا طفت معها الارض شرق وشاما
ياما تعنت لي وانا ماتعنيت = عيني تنام وعينها ماتناما
حطت وشالت لجلي حمولة ونيت = من التعب والهم ولاهتماما
ولن قلت انا تعبان ولا تشكيت = معاد يهناها شراب وطعاما
ظليت اقول امي ليا اصبحت وامسيت = واليوم قولوا لي يتيم اليتاما
ولا قط من قدام بابه تعديت = الا بعد ماقول يمه سلاما
واحب راس تحت ظله تربيت = حتى طلعت من الرجال النشاما
واليوم امر الباب واقول ياليت = وياليت ماتحيي رميم العظاما
اشوف صورتها ليا اقبلت واقفيت = ماتنمحي حتى تقوم القياما
ويالله تجعلني موفق وبريت = بريت فيها ياكريم الكراما
ويالله ياللي عبدك الحي والميت = تجعل لها يارب خير المقاما
في عالي الفردوس مقيال ومبيت= نعم المقام ونعم دار السلاما
صلوا على نبينا يالمباخيت = ويالله توفقنا لحسن الختاما

الله يرحم كل ميت مسلم ومسلمه ومن يستحق ان يبكى بلا جزع مثل الام والاب لله درك انتقاء رائع
ومميز ابيات تقطع نياط القلوب شكري ومتناني لسموك

الله يرحمها ويسكنها الجنه

الله يرحمها ويرحم أموات المسلمين اجمعين

صح لسااانه والله يصبره على فرقاها يرحمها ويجعل الفردوس مثواها ويخليلنا وميماتنا وسلمت يافايز على النقل الطيب ولاهنت

الله يرحمها ويسكنها فسيح جناته هي وأموات المسلمين