مات الذي شوره كما شذرة السيف

أبيات قديمه (مرثية في الوالد أسأل الله أن يتغمده بواسع رحمته ويسكنه فسيح جناته) ،، وقد بنيتها بعد وفاته بسنتين وأرتجلتها في مجلس بعد أن سمعت جميع الحاضرين تشتت آراهم في موضوع معين ولم يستطيعوا أن يعقدوا العزم على رأي واحد ،، فتألمت كثيرا وأرتجلت هذه الأبيات..



مات الذي شوره كما شذرة السيف=رجلٍ على شوره نسوق الركايب
رجلٍ كلامه ينقده نقد صرّيف=صريف مال وعارفٍ بالكسايب
له كلمةٍ تفصل صعاب المواقيف=حلال عسرات الأمور الصعايب
يؤخذ برأيه مقصدٍ للعواريف=ولايعقل الصعبات ياكود شايب
وله ماقفٍ عسر المناويل ومنيف=يتعب رجالٍٍ يشعبون النجايب
وله رأيةٍ ترفع بروس المشاريف=راية فخر عزٍ لكل القرايب
يوم النفاعي جاه محتار ومخيف=جاه وزبن داره نهار النشايب
زبّن أدخيله وأبدل اللبس بنظيف=وأعطاه كروة مركبه للحبايب
ثم ودعه وأوصاه لاتقرب السيف=أنحر علاوي نجد لأهل العصايب
لعلهالك يالنفاعي هفاهيف=وأرواحنا ترخص نهار الحرايب
رجلٍ عطاه الرب حسن التصاريف=لا أحتارت الأفكارعند النوايب
لا أحتار بالعسرات راع التصانيف= عنّز علاه ومنه ماعاد خايب
يالله عساله بالجنان المواريف=منزال بين الأنبياء والصحايب
طالبك يامجر المزون المراديف=وأنت الذي للعبد جزل الوهايب
عليه دمع العين حول ذواريف=دمعٍ تنثر مثل وبل السحايب
وعليه قلبي حنّ مثل الرواجيف= اللي نهار الكون ذخر الكتايب
أنشهد إنه غاب عنا ولا شيف=يوم القبر ركزت عليه النصايب
غاب ورحل بعده جروحي نوازيف=وجرح سطا بالقلب ماهوب طايب
وحالي بعد فرقاه مسلول ونحيف=ماعاد أذوق الزاد شربي غصايب
أبكي على من مات عون المضاعيف= ماأبكي على فقدان راع الذوايب
إي والله أبكي والدي يالمواليف=أبكيه يوم إنه إعن العين غايب
ماشوف وجهه كود بالليل مع طيف=لازارني شبت بقلبي لهايب
ويوم أتذكر كلمته والسواليف=وأذكر أضحوكه والعتب والطلايب
أونس محاديب الضلوع المصافيف=تصفق بعضها صفق والقلب ذايب
صفقات موج البحر لأهل المجاديف=لا حركت موجه سموم الهبايب
مرحوم ياللي تذبح الحيل للضيف=حيلٍ تقلطها سمانٍ عرايب
ماتذبح الهزله ولا تشري ضعيف=وهرجتك للضيفان دايم عذايب
وقلبك حنونٍ وهبة الرب ورهيف=للي قريبٍ منك وأيضا الجنايب
تعطف على الأقراب من غير تزييف=وتعطف على المفطوم وأيضا الحدايب
ويمناك في مد الحساني لها كيف=وماطاب عود غير مجناه طايب
عاداتكم يأهل المهار المعاسيف=ذخرٍ لكم ماجاتكم بالجلايب
وصلاة ربي عد ماأمطرمطر صيف=وإعداد مانبتت نوام الشعايب
على نبيٍ لطف الدين تلطيف=امحمد المختار هو والصحايب

*******

سفر بن مشعان العتيبي

صح لسانك ياسفر

وعسا الله يرحمه ويرحم اموات المسلمين جميعا

والقصيده مؤثره فعلا بدون مجامله وجزله في نفس الوقت ومن شاعر جزل

تحياتي

ونعم يالغالي فيك وفي والدك


الله يرحمه ويسكنه فسيح جناته


مشكور يالغالي على هالجزله


تحياتي

صح لسان اخوي سفر

والله يرحمه ويسكنه الجنه


تحيااااااتي

صح لسانك ياسفر

وعسا الله يرحمه ويرحم اموات المسلمين جميعا

الأخوان

النويري

فيصل المسعودي

بن نعيس

الدلبحي

أشكركم على مروركم وحسن مشاعركم

وجزاكم الله خير الجزاء

لكم تحياتي