نهـــاية مسلســـل

السلام عليكم


عقب البطى والجرح من عقب ما مل=جتني تبي ذاك المسلسل تعيده
تبي تعيد حلقات أوجاعي وتحل=قيود جرحٍ يستلج لولا قيده
ذاك الطريق اللي من الطول أطول=درب الشقا بالطول تبغى تزيده
كلا وليس ما ولم لا لن أفعل=صعب المنى وادراك كل ما تريده
ان كنت عاقل فأطلب ما هوَ يعقل=حتى تطاع لا تطلب اشيا وكيده
لست’ بطل عبله ولست’ مهلهل=لكن أعي معنى مشاعر مجيده
بالمختصر يعني شعوري تبدل=مثلك مثل غيرك بجمله مفيده
ماني على خبرك ليا غبتي أزمل=زملة كسيرٍ ليا تغيّب عضيده
ماني مثل اول ليا شفتك أختل=واشوف ما حولي وجودك يبيده
ما عاد ياثّر دمع عينك ليا هل=غيوم كذّابه وتمطر مكيده
كنتي دفا قلبي وحلمي الأجمل=من بدّ خلق الله أشوفك فريده
كنتي جفن ليلي به الرمش منسل=يشعل حور عينك شموع القصيده
كنتي ولا زلتي قمر حب منحل=تغيبي عن حبٍ خصاله حميده
الحب مفهومه كبيرٍ وأشمل=قلبٍ شكى برده يذوّب جليده
حبٍ ليا أقبل على قلبك أحتل=وجد ومشاعر استحل ماء وريده
ما هو مثل حبك من النبض اعزل=اسمٍ بلا معنى وخالي رصيده
خلاص يكفيني ابي عنّك ارحل=ما كل صقارٍ هوى الطير ايده
ما ابي ابد قربك إذا ودّك أزعل=ماني أنا مثلك وفنّك أجيده
لاني ولد مخرج ولاني ممثل=قرمٍ ولد قرمٍ اموري سديده
صوّر من أبياتي نهاية مسلسل=تنهي بطل قصة دراما نكيده
صاغها قلبٍ من العام منشل=ودّه من أعماقه تكوني بعيده

وسلامتكم

...
صح لسانك
مهاره شعريه ليست عاديه
امكانيات شاعر مذهله..

ولايخدش هذا الجمال
سوى اختلال الوزن في البعض
من ابيات القصيده.
زادك الله من فضله اخي العزيز.
..
لك كل الود والتقدير.

صح لسانك اخوي والله يعطيك العافيه