حربي الثويني وعبدالحميد الطويرش والحمدلله على السلامه

بسم الله الرحمن الرحيم



في يوم من الايام كنت طالع من جنوب مدينة سكاكا قاصدا ً بعض الاقارب في


الهجر والقرى في المنطقه لمعايدتهم بعيد الاضحى . .


حدث لي على الطريق حادث انقلاب طفيف جدا ً بسبب الحفريات


واذا بالاتصالات تنهال علي بعد مضي اقل من ساعه على الحادث ويتحمدون لي ع السلامه


وكان خلف هذا الخبر المطمئن للاهل والاقارب اخي الغالي والشاعر الكبير/حربي الثويني الرويلي


على الرغم من البعد الجغرافي بيني وبينه , وشلون ؟ مدري ؟


المهمّ قلت هذه الابيات :









مشكور ياحربي كثر صب الامطار=انا اشهد انك من عظـام القبيلـه
وشكرا ياحربي على كثر الاصرار=على المراجل ودنـا لـو نجيلـه
وجه(ن) يشوفه وجه حربي بتكرار=انا اشهد انـه مايلصمـق دليلـه
جنحه طفيفه بسيرنا يم الاحـرار=واهل علوم غانمـه حـول جيلـه
نبي نمد الوصل مابيـن الاقطـار=معايده , وصل , ألتمام , اتهليلـه
انا احمدالله سالمه رغـم الاقـرار=باني اعاود كـل ماجيـت اجيلـه





وردّ شاعرنا حربي الثويني (ابو نايف) بــهــذه القصيده :






والله يابو فاتن ولابيننـا اسـرار=القلـب واحـد والمراجـل دليلـه
يرخص لك الغالي مع طول الاعمار=وشرواك صعبن بالخلايـق مثيلـه
حرن ووافي..وللمراجل لك اعصار=يهزّ الجبال الممحلـه المستحيلـه
جدك الاول لانذكر يـوم الاخطـار=تطنخ بوسط الراس نـار الفتيلـه
والله ولاسويت شي ٍ لـك وصـار=ومقصّر بحقك ياراعـي الطويلـه
وابشر بعزّك لاظلمت شمس الاقدار=اجيك كلـي وكـل همّـك بشيلـه
افرح بفرحك يابعد صبح الاخيـار=واحزن لحزنك وافتخـر بالقبيلـه
عبدالحميد لياغدى الوقـت غـدار=مايمشي بدروب الرخـم والفشيلـه
ابن طويرش ان قاد الطوابير صقّار=للعليـا ودروب المراجـل مقيلـه





«®°·.¸.•°°·.¸¸.•°°·.¸.•°®»تقبلوا تحياتي وتقديري



وكل عام وانتم بخير«®°·.¸.•°°·.¸¸.•°°·.¸.•°®»

الحمدلله على السلامه ،، وعوافي أخوي ،، بن طويرش ،،



وصح لسانك ولسان أبو نايف ،، وافين كلكم ولا فيكم قصور لا عدمناكم ،،



وماتشوف شرَ ان شاءالله ،، وهذا إن دلَ دلَ على أخلاقك ونبلك ومحبَتك بين القبيله ،، ،، فتلقيَت الإتصالات من جميع النواحي وفي مدَة قصيره ،، لأن الطيب ذكره ماينقطع كل دقيقه ،،



ونعم فيك وفي ربعك من حدَهَم ليا حدَهم ،، وموفق ان شاءالله ،،


تقبَل مروري !!

سلّمك الله من كل شر يالسميري وصح بدنك وشعورك النبيل وماعليك زود بكل ماتفضّلت به اخي الكريم

وان شاءالله إنا اهلا ً لكل مايرضي الله اولا والوالدين ثانيا ً والذكر الطيب ثالثا ً

بارك الله بك

صحت السنتكم

ولسانك يالعازمي شكرا لك على الحضور

صحت السنتكم



تحياتي ................. ابو شوق الازوري