ياشيـن طبـعٍ فيك .. يا زين الأطباع

يا شيـن طبـعٍ فيـك .. يا زيــن الأطبـاع =لولا الرجــاء .. ما كان خلّيته .. يفـوت
سَـنَـع .. يشـوّه لا تـذكّـرتــه .. أسـنـاع =مثل الحصاة .. اللي وسط عقد ياقــوت
تخـفي هيـامـك .. وإنت ميـّـت وملـتـاع= ما تـدري إنه في ملامـحـك .. منـحـوت
ويبخل لسانك .. وإنت للسمع .. طمّـاع= والبخل .. في سِلْم المحبيـن .. ممـقـوت
الحكي .. قوت السمع / وأسامعي جياع = ومسامـعي ماتت من الجـوع .. للـقـوت
وحكي الغزل في صدرك أشكال وأنواع= لكن صمتك .. حوّل الصـدر .. تـابـوت
إلى طَلَبتـك وصـل .. صعّبـت الأوضـاع =مدري .. من اللي درّسـك جعله يمــوت
تصـد .. ما كـنّـك من الصـد .. مـرتـاع = وإن قلت : يا القاطـع .. تلفّـت مبـهـوت
أقطع بـ دَرْب مواصلك في الشهر.. باع = وإلاّ إنت تقطع للوصل فـ السنة .. فوت
طعني .. وطاوع واحدٍ فيك .. ما طـاع =ناسٍ ضعاف عقول / وأشوار / وبخوت
وإلطف بحال اللي نحـل حاله .. و راع ..= قلبٍ جروحه .. تنزف أفكار .. وبيوت
قلبـي .. إلا منّه شـرى قـلـب .. ما بـاع = وإنت هالله هالله فيه .. والعمـر موقوت
اسمع أشعاري في الهوى وارخ الأسماع =ياللي غـلاك بـ تربـة القلب .. مكـتـوت
لا .. للفـراق .. و لا .. لتجديـد الأوجاع =ونعم .. نعم للوصل .. لو كان بالصوت






الشاعر


محمد بن حمد بن فطيس المري

الله يعافيك


لاهنت ، على مرورك


.