والحوالة راس مال الشايبين

باسمك اللهم نبدا مانقولة ***يا موفق يامسهل يامعين
عند بابك نوخ المذنب ذلوله ***ياملاذ العبد رب العالمين
أعترف قصرت والنفس محمولة ***تتبع مازين ابليس اللعين
المعاصي منذ أيام الطفولة ***نقترفها سر والامعلنين
مرة الدنيا بالامال معسولة ***دار حنا في رجاها مسيرين
لو نطول اشياء شئ مانطولة ***والنهاية في عداد الميتين
الله اكبر يامصيفٍ صيفوله ** كل مقبل صيف قلنا مصيفين
ياعزيزي سؤال أبغى حلولة ***لاجل يقنع راسي اللي مايلين
الشباب اليوم شتان فلولة ***محدرين في الخطأومسندين
في السفر صاير لهم صولة وجولة ***في بلاد المفسدين الفاسدين
كن واحدهم بطل راعي بطولة ***في الغزاة الفاتحين الأولين
من رقى للبست منهم صفقولة ***وان رقص له زول جوه منقطين
ان طلب كاس لمزاجه دبلوله***لين يرى الواحد بعينه ثنين
مابقى من فندق ألاواجروله***لالمحته قلت رجال رزين
ياسفير او مستشار أو ريس دولة ***الوكاد أنه من السلك الثمين
كل يوم بين هذوله وذوله ***يتسول لارحم له والدين
ناس ترفدله وناس مرفدوله ***سهرته شحذه مرار ومر دين
وكان ماحصل بعد هذي سيوله ***فزعة امه عند عوده فزعتين
مع صلاة الصبح صف ذاك طوله ***عند باب البنك جمع واقفين
صف معهم ثم نشد من كان حوله ***وين قسم الصرف للمتقاعدين
وخذ شيكه من يدينه وصرفوله ***قال لله عاقلين موكلين
الدراهم للغليم حولوله ***والحواله راس مال الشايبين
والغليم ثور في عرضه وطوله ***ولايفيد الثور لو انه متين
ماتمر اللوبي الاذاك زوله ***عسكري في فصيل مبزوطين
كل يوم موقفينه بالحموله ***ضمن عسكر كل يوم موقفين
في رجا اللي لامشى تصفق نعوله ***ينطل الردفين بهوين الهوين
وين عنها في الحيا حفصه وخوله ***قبح الله ذيك والمتشبهين
من شباب يرفض المؤمن قبوله ***العزالك ياتراث المسلمين
الولد ذا اليوم في صفة حجوله ***والخواتم والمناكر في اليدين
والشعر عند الكوافير امشطوله***قصة أماالهام وألاصابرين
الملابس والغطاوي قطع شوله***الكعب مايلبس ألا قفلتين
طب وسط السوق ويسحب رجوله**كشح سفتي لايسار ولايمين
وين خالد؟وين طارق؟ويش هوله!؟**أنكروا سم البلا يامنكرين
افزعوا للدين بالله افزعوا له** وش حياة نعيشها من غير دين
يغبن الرجال من شي ن يهوله ** أؤمن ان الله مع الصابرين
من سمعني قال لي ياهول هوله** لايشره لين يشوف الشين لين
لايخطئني الكلام اللي أقوله ** دورة الساعة وكل شي ن يبين
السماء عن الدعاء قفل قفوله** ليه مدري؟ يامغيث السائلين
نية الرجال سابقةٍ فعوله *** كان زينٍ زين والا الشين شين
الإجابة كلمتينٍ ومعقوله*** ضعف وازع دين وأخرى مقلدين
الحضارة مصطلح وله اصوله** لاحضارةلافكر لا مجنبين
تو مستوعبت هذيك المقولة*** ليتنا من حجنا ذا سالمين
ياولد ذيك العرب يابن الحمولة**استمعلي ثم تنبه يافطين
الرجولة يامدورة الرجولة** بالكتاب وسنة الهادي الأمين


أحببت أن أنقل لكم هذه القصيدة وارجو أن تحوز رضاكم

قصيدة ولا أروع...
تسلم يمينك أخوي..

الرجاء كتابة القائل...
أو إذاكانت لك فننقلها لقصائد الأعضاء...










تحيااااااااتي.

قصيدة رائعة جداً


تسلم ياولد العم .. ويعطيك الف عافيه

ولاهنت ،،،،،،،،،

تحيااااااتي

ابو وعيل الرويس

مصدة 2004

الله يستر عليك

وهذي قصيده واقعيه ..

وياماا حصلت.

لكن (ماينعذل عبدا يبي رهاط)

ههههههههههههه

تحياتي..

هلا بولد العم مصده 2004



مشكور وتسلم يمينك

تسلم ولا يسلم ردي العزايم


مشاركة أكثر من رائعة

...