الشيخ براك الجربا والأمير جوفان الجنيدي

قصيدة الشيخ براك بن صالح الجربا
ورد الأمير الشاعر جوفان بن زيدان الجنيدي




يقول الشيخ بــراك الجربا :


الله على جلسات في وسط عكاش
في مجلس ماحظفلوه الخشاشي


ولا إرتكى به كل همّاز لغّاش
وكثر المغالط بينهم والنقاشي


وتصدّر المجلس بغيض وهلاش
لعّان طعّان نفخه المعاشي


في بيت أبو زيدان نزهٍ وحوّاش
جوفان يامنّه هبا كل لاشي


سمح صخي قاسي لياحل شوباش
من لابة ماهي هيار وهشاشي


اخوات سعدى بيوم نايش ونواش
عزك ليامن طوّحن المغاشي


جو للحيا قبلٍ ضياغم وطراش
عوق الضديد إن زاغ خطو القشاشي


مجالس الأجواد يروي بها الناش
الي من همومه لحق به نشاشي


طرق النظر يبعد عن العين الاعماش
في سهلة نبته سوات الفراشي


خضر السهال مزينة وضح الأدباش
عسى تعله مرزمات النواشي


من رايحٍ عقب الإعشاء يرهش رهاش
يطرب قلوب أهل الدبش والمواشي


تلعج بروقه بالسما ترمش رماش
منه الصفا يلمع لميع الغراشي


نومان هات الجيب ياقرم الأغواش
ياشوق من تزهى جميل النقاشي


هاته عسى يفداكم الهيس واللاش
ماهي خسارة قيمة الجيب كاشي


نبيه مع خطو السهل يدهش دهاش
مثل الظليم اللي غشاه الخراشي


يشدي لذيبٍ حدّه الرمي وإنحاش
قدمه هباط ومقتفيه الكلاشي


نبي لنا من فوق هاليوم مطراش
عقب الغلس والجو مابه غباشي


مافوقه إلا عزبة البر وفراش
نبي ندكه مع خطات العفاشي


ترى خفوقي للصحاصيح معطاش
ولابقى بالبر غير العراشي


كلّ نقل للصيد برنوا ورشاش
والصيد خلّص مابقى به طشاشي








ردّ علية الأمير جوفان الجنيدي يقول :


يالله باللي بآخر الليل هتّاش
ياجاعلٍ كل ٍ يجي له معاشي


بديت بإسمك يوم للفعل فتّاش
ترحم ضعيفٍ للخطيات حاشي


ثم أذكر اللي ياومر مثل الأرماش
مثبت قلوب الزايغين الهشاشي


من عقب هاتوا لي فهيمٍ ونقّاش
نخاف من عقب البيوت النقاشي


مدحٍ لأبو خالد على الطيب غبّاش
وجهه بشوش ولايعرف إنكماشي


حييت ياللي منطقك ينعش إنعاش
ياوازن الكلمة بزين النواشي


حييت يابراك وإن جيت عكاش
متريضٍ وإلا تضبّ الفراشي


جتني مناديبٍ لهاالفكر جيّاش
معهن بيوتٍ هيّضن غيب جاشي


مااحلاك مزّاحٍ ضحوكٍ وبشاش
ومجوّدٍ عصى الشريعة وماشي


إنتم هلا الردات يوم العدو هاش
من عرق سيّاح الندى جيت ناشي


وإنتم هلا الفزعات وإن جاك مهتاش
منكم صناديد العرب والبواشي


ومنكم معشين العرب روس الأكباش
أهل الحميّة في نهار إبتلاشي


الفكر يابراك بالحيل منداش
عجزت أميّز الذهب من الشواشي


يامل قلبٍ قام يطرب ويهتاش
يبي الصديق ولايريد الحواشي


يبي النشاما شوفهم ري الأعطاش
جمع الرفاقه غايتي وإنتعاشي


المسبحة تجمع بخيطٍ من الشاش
وليا إنقطع ضاع الخرز والقماشي


ندراه يابراك عن قولهم ماش
وندرّب اللي من بعيدٍ يواشي


ناخذ حساب اللي مريض وغشّاش
الحاسد الفاسد خبيث المماشي


يكفيهم اللي مصلح البيض بأعشاش
مطعم فروخ الحمّرة بالدشاشي


وصلّيت عدّ محمدٍ عدّ ماعاش
من البشر والميتين الخشاشي




...... ارجوا ان تحوز على رضاكـــــم ......

ماقصرت يالاعلامى

بارك الله بك , شكراً أخي الكريم

بيض الله وجهك الله لايهينك على النقل