مرثيه في المرحومه بأذن الله أم عبد الله

هذه مرثيه في المرحومه بأذن الله تعالى أم عبد الله

الله من نفــسٍ عليــه حــزينـــه *** الحزن من بين الضمير شعلــها

من حزنها ضاقت علي الميـــنه *** والكون مما صابها ما وســـــعها

على الذي روحي لروحه قرينه *** تطيب لن طابت وتاجع وجـــــعها

الصاحب اللي كان عيني بعينه *** اللي حيـاتي مع حيــاته جمعــها

والله ما أريد فراقها ساعتــــينه *** بس القدر بعد الصراع أقــــتلعها

بعد العصر للمقبــــره شايــلينه *** عصر الثلاثاء في المقابر وضـعها

من عقب ما غطوه لبـنٍِ وطيــنه *** ما ينفع النـفس الحزيــنه جزعــها

تركتـني للـدهر زيــنه وشيـــنه *** عشره عمر ما كنها عـشت معــها

وقتٍ مضالي ما حسبنا سنينه *** مرتاح من هم السنـــين وفزعــها

ماقط صار خـلاف بيـني وبـــينه *** ولا قال لي دعــها ولا قلـت دعــها

يضمنـا بيت الشرف والسكينه *** على الخصال اللي محمد شرعها

مصيـونهٍ مثل الذهب بالخزينه *** عن الردى والعيب ربي رفـــــــعها

الجـار مايــذكر خــطايا جنــينه *** وكثر الحياه عن ضيقها ما منعــــها

يالله ياللــي كلـــنا ســائليـــنه *** ترحم خـــطاياها وتقــبل ورعــــها

عسى جنان الخلد مأوى جبينه *** هذى منى روحي وهذا طمـــعها

حكــم القــدر من ربنا قابليـــنه *** نرجو لها الفران في مضطجـعها

وهذا ختام القيل يا سامعــينه *** يدعولــها بالمــغفره من سمــعها

كلمـــآت آلشــــآعر :: ســـآلم بن مــآجد آلغنــــآمي

الله يرحمها ويرحم اموات المسلمين

الله يرحمها ويرحم موتى المسلمين

الله يرحمها ويرحم أموات المسلمين