مالي على الحب طوقه ..

السلام عليكم ..




يازين انا مالي على الحب طوقه=قبلك حبيبن مادرى وش جرا لي
يبس عروقي يبس الله عروقه=بعطيك علمه دون ذكر السوالي
ذوقني اللي ماتحملت اذوقه=ذوقني المره بعد كاس حالي
وانا ليا شفته اهم ابلحوقه=مار ان لي عزه تهز الجبالي
ون باقني بالعهد ما اقدر ابوقه=لو راح واقفا مانشد عن حوالي
يبقى بفكرن ياصل الماء عروقه=طول النهار وطول كل الليالي
مثل السحاب اللي تنوض بروقه=يسقي مطرها الارض مائن زلالي
وان كان تبغا الوصف محدن يفوقه=لافالعيون ولا الحلا والدلالي
الخشم سلت سيف محدن يعوقه=جيده طويل امع الرقاب الطوالي
شمس الضحى خده ولاهي شروقه=والعين سودا مثل عين الغزالي
للحب سوق ولانزل وسط سوقه=ان شافه البخلان طش الريالي
تغري عيونه كل يدن سروقه=مير البليه زين صعب المنالي
تتعب وراها كل خيلن سبوقه=وان زرفلت وان درهمت له جمالي
مثل السراب اللي تعب من لحوقه=ضميان جريه طيح إله العقالي
لاتبلش المبلي بما لايطوقه=الحب ضيع كل شين طرالي

وسلامتكم ..

صح لسانك ياعبدالله

,,

صح لساااااانك ياعبد الله العتيبي

قصيدة جميله تستحق الشكر عليها.

,,,,,,

وانت سالم وغانم ياسبحان الله والله مادريت ان احد يقدر يتعلم الشعر,,بهالسرعه


صح لسانك ياشاعرنا/ عبدالله العتيبي

رايع بس الغزال لاتاصف على عينه بعدين لان عين الغزال ماهيب زينه عين تيس ويمكن الوصف على عنقه لان عنقه هو الحلو

ماعليك من الي تسمعه من نجوم برامج الفضائيات غلط والشاعر يجب ان يكون قدوه ل الصح

اقبل مروري

صح بدنكم جميع والاجل مروركم
واعتذر منك اخي محمد بخصوص التنسيق انا كمبيوتري ماك ومتصفح السفاري او اي متصفح خاص بالنظام لايقبل تنسيق ولايظرها وهذي المشكله

الشاعر فيصل مطر
الله يعطيك العافيه وبيض الله وجهك الغزل انا دايم اجيب العيد فيه وانت صادق في كلمه الشطر كان
العين سودا مثل سود الغزالي وكنت اقضد المثل - اسود من الغزال ولكن انتقدني فيها احد الشعراء وعدلتها كذه ومشكور لتصحيح المعلومه